У сярэдзіне 1990-х пошукі крэатыва з эксклюзівам прывялі мяне, уласнага карэспандэнта «Магілёўскіх ведамасцей», у вёску Завалочыцы на Глушчыне. Вядомая яна была тым, што тут добра захаваўся памешчыцкі дом і іншыя, як тады казалі, «панскія» пабудовы. Галоўнай жа славутасцю сярод іх быў, безумоўна, спіртзавод, які дзейнічаў тут з канца XIX стагоддзя. І ён быў запасным варыянтам, калі нічога цікавейшага адшукаць не давялося б.