У галіне вытворчасці прамысловай прадукцыі занята больш за 1600 прадпрыемстваў з агульнай колькасцю працоўных больш за 128 тысяч чалавек (28,6% ад агульнай колькасці занятых у эканоміцы вобласці). У структуры галіны амаль 90% займае апрацоўчая прамысловасць, якая фарміруе больш за трэць валавога рэгіянальнага прадукту.

Асноўнымі яе галінамі з’яўляюцца вытворчасць харчовых прадуктаў, вытворчасць гумовых і пластмасавых вырабаў, хімічная вытворчасць і вытворчасць машын і абсталявання. Сярод рэгіёнаў рэспублікі Магілёўская вобласць з’яўляецца галоўнай вытворцай хімічных валокнаў, цэменту, жалезабетонных шпал, тканін, плодаагароднінных кансерваў. У вобласці засяроджаны рэспубліканскі аб’ём вытворчасці ліфтаў і шын аўтамабільных і для сельскагаспадарчых машын. На працягу апошняга дзесяцігоддзя праведзена маштабная мадэрнізацыя «Магілёўліфтмаша», цэментных заводаў, папяровай фабрыкі «Спартак» і завода газетнай паперы, мясамалакаперапрацоўчых прадпрыемстваў. З мадэрнізацыяй у вобласць прыйшлі новыя тэхналогіі, новыя ідэі, новыя падыходы ў кіраванні. Сёння маштабная мадэрнізацыя працягваецца на «Белшыне». ААТ «Магілёўхімвалакно» ў два этапы рэалізуе інвестыцыйны праект па вытворчасці поліэфірнай прадукцыі. У канцы 2018 года ў эксплуатацыюўведзена вытворчасць па выпуску поліэфірнага валакна спосабам прамога фармавання.

У прамысловым сектары рэгіёна вырабляецца 29,9% рэспубліканскага аб’ёму паперы і кардону, каля 25% – кандытарскіх вырабаў з шакаладу і цукру, 20,5% – цэглы і блокаў будаўнічых, 18,2% – натуральнамалочнай прадукцыі. Чацвёрты год запар назіраецца станоўчая дынаміка развіцця прамысловай галіны. Па выніках 2016 года тэмп росту прамысловасці ў супастаўнай ацэнцы склаў 101,3%, па выніках 2017 года –105,7%, па выніках 2018-га–103,8%, 2019-га–100%. Пры гэтым не дапускаецца росту звышнарматыўных складскіх запасаў.

У адносінах, напрыклад, да 2013 года ў натуральным выражэнні павялічылася вытворчасць ліфтаў, валокнаў хімічных, натуральнамалочнай прадукцыі, сыроў, безалкагольных напояў і інш.Спрыяльнае інвестыцыйнае асяроддзе за апошнія пяць гадоў дазволіла прывабіць у вобласць больш за 1,2 мільярда долараў замежных інвестыцый, у тым ліку 860 мільёнаў долараў прамых замежных інвестыцый. На тэрыторыі рэгіёна рэалізуецца 47 буйных інвестыцыйных дагавораў, а свабодная эканамічная зона «Магілёў» стала пляцоўкай росту інвестыцый у эканоміку вобласці. Геаграфія імпарту капіталу шырокая, найбольшыя аб’ёмы прыпадаюць на Расійскую Федэрацыю, Кіпр, Нідэрланды, Літву, Вялікабрытанію, ААЭ, Ірландыю, Латвію, Германію і Сінгапур.