Экспазіцыя Made in Belarus адкрылася на 75-й міжнароднай тэхнічнай выставе International Technical Fair, якая праходзіць па 28 верасня ў Плоўдзіве (Балгарыя). Пра гэта паведамілі ў аддзеле па маркетынгу і сувязях з грамадскасцю прадпрыемства «Белінтэрэкспа» Беларускай гандлёва-прамысловай палаты.

Сваю прадукцыю прадстаўляе пяць айчынных прадпрыемстваў нафтахімічнай прамысловасці. У прыватнасці, ААТ «Белшына» знаёміць наведвальнікаў з шырокім асартыментам шын для легкавых і грузавых аўтамабіляў.

Усяго ў выставе International Technical Fair прымае ўдзел больш за 500 кампаній з 35 краін, у тым ліку з Аўстрыі, Бельгіі, Грэцыі, Даніі, Індыі, Іспаніі, Італіі, Канады, ЗША, Турцыі, Швецыі, Японіі. Юбілейная выстава ў Плоўдзіве абяцае стаць адным з самых маштабных бізнес-мерапрыемстваў Паўднёва-Усходняй Еўропы, якое аб’ядноўвае каля 25 тыс. прафесіяналаў прамысловай і тэхнічнай індустрыі. У цырымоніі адкрыцця прыняў удзел прэм’ер-міністр Балгарыі Бойка Барысаў.