ААТ «Магілёўліфтмаш» дамовілася аб удзеле ў праграме замены старых ліфтаў у Арменіі. Такая інфармацыя размешчана на афіцыйным сайце прадпрыемства.

План сумесных мерапрыемстваў па развіцці двухбаковага супрацоўніцтва паміж Міністэрствам прамысловасці Беларусі і Міністэрствам тэрытарыяльнага кіравання і развіцця Арменіі сумесна з мэрыяй Ерэвана уключаў серыю сустрэч па магчымасці ўдзелу ААТ «Магілёўліфтмаш» у праграме замены састарэлых ліфтаў у Арменіі. Папярэднія дамоўленасці выліліся 2 красавіка ў візіт кіраўнікоў Ерэванскага ЗАТ «РАФЭЛГРЫГ» на магілёўскае прадпрыемства.

Па выніках перамоў падпісаны мемарандум аб супрацоўніцтве, дылерскі дагавор, пагадненне аб супрацоўніцтве з перспектывай стварэння зборачнай вытворчасці на тэрыторыі краіны-партнёра.
Госці азнаёміліся з працай вытворчых цэхаў, правялі перамовы з кіраўнікамі і спецыялістамі ААТ «Магілёўліфтмаш». Бакі абмеркавалі асноўныя этапы супрацоўніцтва, стварэнне сумеснай зборачнай вытворчасці з лакалізацыяй вырабу дэталяў і вузлоў на вытворчых плошчах ЗАТ «РАФЭЛГРЫГ», узаемадзеянне ў забеспячэнні працэсу зборкі і мантажу ліфтаў кваліфікаванымі спецыялістамі ў адпаведнасці з тэхнічнымі патрабаваннямі ЕАЭС.