Сёння спаўняецца 100 гадоў з дня выхаду ў свет першага нумара абласной газеты «Магілёўская праўда».

«100 гадоў – салідны тэрмін для друкаванага выдання. За свой доўгі і слаўны шлях газета неаднаразова мяняла сваю назву, але нязменна заставалася адным з самых паважаных і кампетэнтных сродкаў масавай інфармацыі вобласці, заўсёды адрознівалася такімі важнымі якасцямі, як аб’ектыўнасць, аператыўнасць, дакладнасць, граматнасць падачы інфармацыі», – адзначыў у сваім віншаванні калектыву рэдакцыі са значнай юбілейнай датай старшыня Магілёўскага абласнога выканаўчага камітэта Уладзімір Даманеўскі.

У рамках падрыхтоўкі да знамянальнай даты на працягу мінулага года журналістамі газеты было падрыхтавана два тэматычныя праекты. Разам з чытачамі журналісты гарталі падшыўкі газет «Магілёўскай праўды» паўвекавой даўнасці. Юбілейнай даце быў прысвечаны і праект «100 гадоў «МП»: гісторыя газеты ў асобах», які атрымаў шырокі чытацкі водгук. Аўтарамі матэрыялаў сталі ветэраны «Магілёўскай праўды», яны расказалі аб самых яркіх эпізодах сваёй журналісцкай дзейнасці. А на гэтым тыдні ў будынку магілёўскага Дома друку пачала працу выстава «З юбілеем, Магілёўка»!», падрыхтаваная адным з самых вядомых у галіне фотакарэспандэнтаў Ірынай Савосінай. Яна прапрацавала ў «Магілёўскай праўдзе» чвэрць стагоддзя і асабіста ведала многіх ветэранаў газеты, якія сталі на гэты раз галоўнымі героямі яе фоталетапісу.

Урачыстае мерапрыемства, прысвечанае 100-годдзю газеты, адбудзецца 26 студзеня. Яго ўдзельнікамі стануць прадстаўнікі ўлады, ветэраны газеты, госці з усіх абласцей Беларусі.