Абласны маладзёжны форум «Кветкі Вялікай Перамогі» адбудзецца 11 мая ва УА «Магілёўскі дзяржаўны прафесійны агралесатэхнічны каледж імя К. П. Арлоўскага». Пра гэта паведамілі ў Магілёўскім абласным камітэце ГА «БРСМ».

Удзельнікамі мерапрыемства стануць першыя сакратары тэрытарыяльных камітэтаў «Беларускага рэспубліканскага саюза моладзі», актывісты маладзёжнай і піянерскай арганізацый, прадстаўнікі выканаўчай улады, абласнога аддзялення «Беларускі фонд міру», раённай арганізацыі ветэранаў вайны і працы, абласной асацыяцыі малалетніх вязняў фашысцкай няволі, абласнога гісторыка-патрыятычнага пошукавага клуба «Віккру», ветэран камсамольскага руху Вера Кастэнка.

Падчас форуму пройдзе дыялог пакаленняў, дзе маладыя людзі падзеляцца думкамі, з якімі сустрэлі 9 Мая, пачуюць пажаданні ад старэйшага пакалення, даведаюцца, чаго трэба сцерагчыся, чэрпаючы інфармацыю аб Вялікай Айчыннай вайне з неафіцыйных крыніц.

Абмеркаванню будзе папярэднічаць выставачная экспазіцыя на ваенную тэматыку ад сацыяльна-культурнага грамадскага аб’яднання «Спадчына». Таксама ўдзельнікі і госці форуму змогуць паўдзельнічаць у акцыі «Ліст Пераможцу!» і пакінуць у трохкутніках свае пажаданні ветэранам. Пасланні будуць перададзены Магілёўскаму абласному Савету ветэранаў на мітынгу-рэквіеме «Звон смутку», які адбудзецца раніцай 22 чэрвеня на мемарыяльным комплексе «Буйніцкае поле», і ў далейшым адправяцца адрасатам.

Завершыць форум патрыятычная акцыя «Нам завешчана памяці слава», падчас якой будуць ускладзены кветкі да партрэтаў герояў Вялікай Айчыннай вайны, якія вызвалялі Магілёў, і экскурсійная праграма па ваеннай экспазіцыі пад адкрытым небам.

Пачатак мерапрыемства ў 12.00.