Адзінаццаць прыватных перавозчыкаў звярнуліся да заказчыкаў, якімі з’яўляюцца мясцовыя распарадчыя і выканаўчыя органы ўлады (у вобласці пакуль не вызначаны адзіны аператар перавозак), з заявамі аб пераходзе ў легальны рэжым працы на ўмовах рэгулярных перавозак. Пра гэта паведаміў начальнік аддзела транспарту і камунікацый камітэта па архітэктуры і будаўніцтве Магілёўскага аблвыканкама Уладзімір Казусеў.

Зараз разглядаецца пытанне аб выдачы ім часовых дазволаў для працы на трох маршрутах: Магілёў – Мінск, Магілёў – Чавусы і Магілёў – Горкі. У прыватнасці, ідзе ўзгадненне раскладу руху з тэрміналамі як з пачатковага, так і канечнага пунктаў адпраўлення. «Як толькі гэтыя пытанні будуць вырашаны, прыватныя перавозчыкі прыступяць да працы на названых маршрутах», – адзначыў Уладзімір Казусеў. Па яго словах, са многімі іншымі перавозчыкамі актыўна вядзецца перагаворны працэс, шырокая тлумачальная праца па правілах абноўленага закона аб транспарце і аўтамабільных перавозках. «Мы спадзяёмся, што ўсе нявырашаныя пытанні ў найбліжэйшы час будуць урэгуляваны, значная частка прыватных перавозчыкаў легалізуецца і пачне працу ў абноўленых умовах на рэгулярных маршрутах вобласці», – выказаў упэўненасць суразмоўца.

Пры гэтым ён звярнуў увагу, што тыя ўладальнікі маршрутак, якія раней працавалі афіцыйна на рэгулярных маршрутах, не прыпынялі сваю дзейнасць. Таму сур’ёзных праблем з дастаўкай пасажыраў у той ці іншы населены пункт вобласці і краіны не ўзнікала.

БЕЛТА