Сельскагаспадарчыя арганізацыі Магілёўскай вобласці ў 2018 годзе плануюць нарыхтаваць на зімова-стойлавы перыяд для галіны жывёлагадоўлі амаль 2,1 млн. т кармавых адзінак, што на 35% больш, чым у мінулым годзе. Пра гэта паведамілі ў камітэце па сельскай гаспадарцы і харчаванні аблвыканкама.

На ўмоўную галаву жывёлы павінна прыйсціся 35,3 ц кармавых адзінак. У тым ліку травяных кармоў у вобласці будзе нарыхтавана 1,3 млн т, у разліку на адну ўмоўную галаву жывёлы – 32,1 ц кармавых адзінак. Акрамя таго, у летне-пашавы перыяд плануецца скарміць больш за 3,1 млн. т зялёнай масы.

План першага ўкосу ў рэгіёне – 207,1 тыс. га. У структуры ўкоснай плошчы шматгадовыя травы займаюць 117,4 тыс. га (57%), лугавыя ўгоддзі – 89,7 тыс. га (43%). З першага ўкосу плануецца нарыхтаваць травяных кармоў не менш за 445 тыс. т кармавых адзінак – 34% да задання (11 ц кармавых адзінак на ўмоўную галаву).

Сельгасарганізацыі вобласці праводзяць комплекс мер па стварэнні трывалай кармавой базы. Па стане на 10 мая, шматгадовыя травы на раллі падсеяны на плошчы 52,9 тыс. га, або 68% да плана, у тым ліку бабовыя і бабова-злакавыя на 48,3 тыс. га (72%). У бягучым сезоне плануецца пасеяць люцэрну на 15 тыс. га (фактычна ўжо пасеяна на 2,2 тыс. га, ці 15% плошчы). Для выканання задання патрабуецца яшчэ набыць 180 т насення (у наяўнасці 82 т, або 46%). У мэтах папаўнення кармавой базы ў планах пасеяць аднагадовыя кармавыя культуры на 77 тыс. га (засеяна 53,4 тыс. га, або 69%). Плошчу 40 тыс. га зоймуць прамежкавыя культуры.

Для забеспячэння захаванасці нарыхтаваных травяных кармоў у сельгасарганізацыях вобласці маецца 2089 тыпавых сянажна-сіласных сховішчаў аб’ёмам закладкі травяных кармоў 3,2 млн т. На 8 мая вызвалена ад корму 1529 сховішчаў, або 73%, падрыхтавана 714 (47% ад вызваленых), з іх прадэзінфікавана 31, або 18%. У мэтах захавання тэхналогіі закладкі кармоў плануецца набыць кансервантаў на суму не менш за Вг5 млн, плёнкі для ўкрыцця траншэй на Вг602 тыс., сеткі і стрэйч-плёнкі для нарыхтоўкі кармоў па прагрэсіўных тэхналогіях на Вг3,3 млн.

«Галоўная задача аграрыяў у гэтым сезоне – гэта строгае выкананне тэхналогій і нарыхтоўка якасных кармоў, што ў выніку дазволіць павысіць прадуктыўнасць працы галіны жывёлагадоўлі», – падкрэслілі ў аблсельгасхарчы.

БЕЛТА