«Бабруйскаграмаш» адкрыў зборачную вытворчасць сельгастэхнікі ў Егіпце, паведамляецца на сайце прадпрыемства.

Зборачную вытворчасць арганізавана ў Каіры на базе кампаніі Helwan Machinery and Equipment, якая ўваходзіць у Нацыянальную арганізацыю ваеннай прамысловасці Егіпта. Яго адкрыццё стала магчымым дзякуючы дагавору ў рамках мемарандума аб узаемаразуменні, які беларускае прадпрыемства падпісала з Helwan Machinery and Equipment ў 2017 годзе.

На семінары-прэзентацыі, арганізаваным пры ўдзеле пасольства Беларусі ў Егіпце, прадстаўнікі беларускай і егіпецкай кампаній прадставілі ўдзельнікам пяць машын сумеснай зборкі. Гэта ротарныя касілкі, рулонныя прэс-падборшчыкі і машына для ўнясення цвёрдых арганічных угнаенняў.

Прадстаўнікі «Бабруйскаграмаша» правялі перагаворы з кіраўніцтвам егіпецкіх кампаній і арганізацый, зацікаўленых у набыцці прапанаванай тэхнікі. Яны таксама расказалі пра перспектывы далейшага развіцця вытворчасці, у тым ліку за кошт павелічэння долі яе лакалізацыі.

Адбылася сустрэча прадстаўнікоў «Бабруйскаграмаша» з кіраўніцтвам Егіпецкай кампаніі па сельскагаспадарчым развіцці. Абмяркоўваліся перспектывы сумеснай працы па прасоўванні прадукцыі беларускага прадпрыемства для патрэб фермераў у розных рэгіёнах Егіпта.

ААТ «Кіруючая кампанія холдынгу «Бабруйскаграмаш» вырабляе больш за 80 найменняў сельскагаспадарчай тэхнікі для ўнясення угнаенняў, нарыхтоўкі і раздачы кармоў, уборкі лёну, прычапных транспартных сродкаў і г. д. Машыны для аграрнага сектара з маркай «Бабруйскаграмаш» працуюць амаль у 50 краінах.

БЕЛТА

Фота - ААТ «Кіруючая кампанія холдынгу «Бабруйскаграмаш»