Бабруйскае ААТ «Славянка» з пачатку года вырабіла больш за 4 тыс. адзінак скуранога адзення, што больш чым у пяць разоў перавышае паказчык за ўвесь мінулы год. Пра гэта паведаміў дырэктар прадпрыемства Тэймураз Бачарышвілі.

«Калі ў мінулым годзе мы толькі пачалі асваенне выпуску гэтай імпартазамяшчальнай прадукцыі, то ў гэтым ужо выйшлі на яе масавую вытворчасць. За кароткі прамежак часу асвоена каля 30 мадэляў. Гэта стыльнае і зручнае адзенне, якое паспяхова канкурыруе на беларускім рынку з турэцкімі аналагамі па якасці і цане. Вядома, нам яшчэ трэба працаваць над пашырэннем асартыменту, тут мы пакуль прайграем канкурэнтам, але ў развіцці гэтага кірунку бачым добрыя перспектывы», – адзначыў Тэймураз Бачарышвілі.

Новая калекцыя створана сумесна з бабруйскім гарбарным камбінатам, які рыхтуе для прадпрыемства скуру з аўчыны. «Мясцовыя гарбары дамагліся добрага вырабу скур, таму нашыя вырабы атрымаліся лёгкія і зручныя. Гэта мужчынскія і жаночыя скураныя курткі, у тым ліку уцепленыя, скураныя плашчы і кепкі», – расказаў кіраўнік прадпрыемства.

Каля 80% скураных вырабаў экспартуецца ў Расію, пераважна ў Маскву. «Несумненна, попыт на новую прадукцыю ёсць, яна канкурэнтаздольная на ўнутраным і знешнім рынках, таму мы маем намер развіваць гэты кірунак, пашыраючы асартымент скуранога адзення. Тым больш што пакуль вытворчыя магутнасці абсталявання загружаныя прыкладна напалову», – заўважыў дырэктар.

Прадпрыемства заснавана ў 1930 годзе, рэарганізавана ў ААТ у 1993 г. «Славянка» спецыялізуецца на выпуску адзення для дарослых і дзяцей.

БЕЛТА