Барцоў з 30 дзяржаў збярэ ў горадзе на Бярэзіне Чэмпіянат свету па панкратыёне. Спаборніцтвы адбудуцца 1-4 лістапада на«Бабруйск-Арэне». Пра гэта паведамілі ў прэс-службе Беларускай федэрацыі панкратыёна і змешаных баявых адзінаборстваў.

Турнір стане самым маштабным за апошнія гады. Для параўнання: год таму ў Расіі на спаборніцтва сабраліся байцы з 22 дзяржаў.

Падчас чэмпіянату свету будзе разыграна каля 70 камплектаў медалёў. Спаборніцкую праграму падзеляць на чатыры групы: фул-кантакт (практычна не мае абмежаванняў у баі), Athlima (так званы «лайт-кантакт»), polydamas і palesmata (дэманстрацыйныя камандныя віды). У турніры прымуць удзел мужчыны і жанчыны ў розных узроставых і вагавых катэгорыях.

Упершыню за ўвесь час правядзення чэмпіянатаў свету кожнай камандзе дазволена заявіць па тры байцы ў кожнай вазе. Гэта значыць, што ў Бабруйску збярэцца больш за 300 найлепшых байцоў панкратыёна.

Беларусь традыцыйна паспяхова выступае на сусветных і кантынентальных чэмпіянатах па панкратыёне. Так, у мінулым годзе на планетарным форуме ў Сочы каманда з шасці спартсменаў заваявала сем медалёў, у тым ліку два залатыя. Цяпер у Бабруйску чакаецца выступленне як пачаткоўцаў спаборніцтваў падобнага ўзроўню, так і вопытных байцоў, а таксама легенды адзінаборстваў, ураджэнца горада на Бярэзіне Арцёма Дамкоўскага. За яго плячыма – паспяховыя выступленні на турнірах самага высокага рангу па рукапашным і ўніверсальным баі, панкратыёне. Акрамя таго, Дамкоўскі быў першым чэмпіёнам у лёгкай вазе ў гісторыі вядомага прамоўшэна, які праводзіць баі па ММА, M-1 Global.

Нацыянальныя першынствы па панкратыёне, якія праводзяцца ў Беларусі, заўсёды вылучаліся высокім узроўнем арганізацыі, спаборніцтвы запаміналіся не толькі напалам барацьбы, але і маляўнічымі цырымоніямі адкрыцця і закрыцця, забавамі для гледачоў. У 2018 годзе чэмпіянат свету, напрыклад, упершыню атрымае ўласны лагатып.

Унікальным стане і месца правядзення спаборніцтваў. Трыбуны «Бабруйск-Арэны», пабудаванай у 2008 годзе, змесцяць амаль 8 тыс. гледачоў. Гэта будзе першы чэмпіянат свету па якім-небудзь відзе спорту, які адбудзецца на базе спарткомплексу.

Панкратыён з’яўляецца адроджаным відам спорту. У баі дазваляецца ўжываць практычна ўвесь арсенал тэхнічных дзеянняў з іншых відаў адзінаборстваў. Панкратыён лічыцца прабацькам папулярных сягоння ва ўсім свеце ММА, і многія спартсмены паспяхова выступаюць у вядучых сусветных прамоўшэнах. Спартсмены праводзяць паядынкі па панкратыёне ў спецыяльнай абароне, устаноўлены выразныя правілы барацьбы, што робіць іх бяспечнымі і дазваляе займацца дадзеным відам спорту юнакам з ранняга ўзросту.

Арганізатарамі спаборніцтваў выступаюць Міжнародная федэрацыя «Аб’яднаны свет барацьбы» і Беларуская федэрацыя панкратыёна і змешаных баявых адзінаборстваў.