Бібліятэкі абласнога цэнтра 13-14 верасня запрашаюць чытачоў на «Бібліяпрыцемкі». Пра гэта паведамілі ва УК «Цэнтралізаваная сістэма дзяржаўных публічных бібліятэк г. Магілёва».

Наведвальнікі, якія прыйдуць у гэтыя таямнічыя вечары ў любімую або незнаёмую бібліятэку, атрымаюць зарад бадзёрасці, добрага настрою і трохі чароўнай магіі кніг на некалькі дзён наперад, абяцаюць арганізатары мерапрыемства. Чытальныя залы і абанементы ператворацца ў майстэрні па вырабе чароўных прадметаў, казачныя літаратурна-музычныя гасціныя. Самі бібліятэкары стануць кніжнымі феямі, захавальнікамі старажытных фаліянтаў і магутнымі чараўнікамі кніжнага свету.

Для магілёўцаў і гасцей горада падрыхтавана вялікая праграма: забаўляльныя конкурсы, эрудыт-шоу, супергеройскія вечарынкі, інтэлектуальныя гульні і квэсты, акцыі-розыгрышы, караоке для ўсёй сям’і. Выставы-экспазіцыі з найлепшымі навінкамі літаратуры і кніжныя акцыі прыемна здзівяць ўсіх аматараў чытання.