Больш за 50 канкурсантаў прыме ўдзел у абласных галіновых спаборніцтвах прафесійнага майстэрства вальшчыкаў лесу «Лесаруб – 2018» у Бялынічах. Мерапрыемства стартуе 22 чэрвеня ў 9.00 на пляцоўцы каля ФАКа «Друць». Пра гэта карэспандэнту сайта паведамілі ў ДЛГУ «Бялыніцкі лясгас».

За перамогу пазмагаюцца каманды з 13 лесагаспадарчых устаноў – найлепшыя дружыны аналагічных рэгіянальных спаборніцтваў. У кожнай будзе чатыры вальшчыкі лесу (у тым ліку адзін юніёр). Таксама на мерапрыемства прыедзе зборная каманда са складу падпарадкаваных арганізацый Мінлясгаса.

Канкурсанты будуць змагацца ў такіх аперацыях, як «валка дрэва» (пройдзе на тэрыторыі Кіраўскага лясніцтва), «замена ланцуга», «раскражаўка камбінаваным рэзам», «дакладная раскражаўка», «абрэзка сукоў». Запланавана і традыцыйная эстафета.

Спаборніцтвы лесарубаў – гэта займальнае відовішча, дэманстрацыя віртуознага валодання інструментамі, выдатная магчымасць бліжэй пазнаёміцца з прафесіяй вальшчыка лесу, адзначылі суразмоўцы.