У Магілёўскай вобласці сёння праходзіць суботнік па азеляненні і навядзенні парадку на зямлі. Праца кіпіць на многіх аб’ектах рэгіёна, але асноўныя працоўныя сілы кінутыя на добраўпарадкаванне двароў, плошчаў, сквераў, вуліц, паркаў і зон адпачынку. Тут упор робіцца на пасадку новых дрэў і кустоў.

У Магілёве масавыя пасадкі арганізавалі адразу на некалькіх пляцоўках. У прыватнасці, каля новай школы ў Казіміраўцы ўжо высадзілі 80 туй, а на вуліцах мікрараёна з’явілася больш за 800 новых дрэў і 100 кустоў.

У гутарцы з журналістамі старшыня Магілёўскага аблвыканкама Леанід Заяц выказаў словы падзякі ўсім, хто сёння бярэ ўдзел у азеляненні гарадоў, райцэнтраў і пасёлкаў. Кіраўнік рэгіёна адзначыў, што асноўная мэта суботніка – зрабіць нашы населеныя пункты больш прыгожымі, аб’яднаць у важнай справе навядзення парадку на малой радзіме намаганні ўлад і насельніцтва. «Талакой лягчэй выконваць гэту працу», – падкрэсліў Леанід Заяц, выказаўшы ўпэўненасць, што гэты дзень дадасць у будучыні зялёных масіваў на карце рэгіёна.

Паводле слоў старшыні Магілёўскага абласнога Савета дэпутатаў Дзмітрыя Харытончыка, плануецца, што падчас абласнога суботніка жыхары Прыдняпроўскага краю высадзяць больш за 50 тыс. маладых дрэў і кустоў. Удзельнікамі гэтай добрай справы стануць каля 15 тыс. чалавек. «Без сумневу, новыя дрэвы, пасаджаныя з душэўнай цеплынёй, зробяць месцы любімымі для нашых жыхароў», – сказаў Дзмітрый Харытончык.

Дарэчы, новыя туі каля Магілёўскай школы № 46 гарманічна ўпісаліся ў пейзаж. Яны непераборлівыя ў доглядзе, але надалі аскетычнай цэнтральнай алеі, якая вядзе да новай навучальнай установы, прывабнасць і прыгажосць.