Больш за 90 пытанняў паступіла ад насельніцтва рэгіёна падчас вывучэння ўражанняў ад якасці аказання паслуг арганізацыямі Магілёўскай вобласці. Пра гэта паведамілі ў аддзеле па працы са зваротамі грамадзян і юрыдычных асоб аблвыканкама.

Там жа растлумачылі, што варыянт вывучэння меркавання праз тэлефонную сувязь абласной міжведамаснай рабочай групай прымяняўся ўпершыню. Да гэтага яна з лютага 2016 года, гэта значыць з моманту стварэння па ініцыятыве старшыні Магілёўскага аблвыканкама, практыкавала збор інфармацыі аб рабоце арганізацый жыллёва-камунальнай гаспадаркі, аховы здароўя, гандлю, устаноў адукацыі, транспарту і іншых аказальнікаў паслуг, якія забяспечваюць жыццядзейнасць жыхароў рэгіёна, праз наведванне асобных раённых цэнтраў.

На арганізаваную «тэлефонную лінію» ў перыяд з 23 па 27 кастрычніка паступілі 92 пытанні. Самымі актыўнымі былі магілёўцы – 29 зваротаў. Выкарысталі магчымасць выказацца 16 жыхароў з Асіповіцкага і 13 з Крычаўскага раёнаў, па 5 званкоў паступіла з Магілёўскага, Бялыніцкага і Быхаўскага раёнаў.

У разрэзе тэматыкі зваротаў на першым радку пытанні, якія тычацца сферы жыллёва-камунальнай гаспадаркі (49), на другім – ахова здароўя, на трэцім – транспартнае забеспячэнне.

«Асаблівасць такога варыянту размовы з жыхарамі рэгіёнаў вобласці ў тым, што ёсць магчымасць не толькі паведаміць аб факце няякаснага аказання паслугі, але і ўнесці прапановы па ўдасканаленні працы той ці іншай сферы. Да таго ж паведаміць аб заўвагах можна ў вусным выглядзе і без прадастаўлення асабістых каардынат – гэта значыць, няма параметраў, якія б абмяжоўвалі жаданне выказацца», – адзначылі ў аддзеле па працы са зваротамі грамадзян і юрыдычных асоб. Паводле інфармацыі яго спецыялістаў, у цяперашні час поўны пералік зваротаў класіфікаваны і накіраваны па прыналежнасці ў гаррайвыканкамы, структурныя падраздзяленні аблвыканкама, абласныя службы для кіраўніцтва ў працы, прыняцця канкрэтных мер па рэалізацыі прапаноў насельніцтва і ліквідацыі выяўленых недахопаў і заўваг.

У канцы лістапада члены рабочай групы вывучаць вынікі рэагавання, пасля чаго імі будзе прынята рашэнне аб працягу практыкі вывучэння меркавання насельніцтва па якасці аказання паслуг з дапамогай тэлефона.

mogilevnews.by