Каля 20 дэкаратыўных кветнікаў і кветкавых кампазіцый з’явіцца 24 жніўня ў Горках. Такі незвычайны падарунак жыхарам райцэнтра паднясуць удзельнікі абласнога конкурсу прафмайстэрства «Магілёўскі майстар – 2018» па прафесіі рабочы зялёнага будаўніцтва.

Па словах намесніка старшыні абласнога камітэта прафсаюза работнікаў мясцовай прамысловасці і камунальна-бытавых прадпрыемстваў Паўла Жуйкова, спаборніцтвы, якія пройдуць у шосты раз, прымеркаваны да Года малой радзімы. За званне найлепшых спецыялістаў па добраўпарадкаванні і ландшафтным дызайне будуць змагацца работнікі 18 камунальных прадпрыемстваў вобласці.

«Кожны з заяўленых макетаў работ па-свойму цікавы, – адзначыў суразмоўца. – Створаныя рукамі работнікаў ЖКГ кветкавыя кампазіцыі стануць сапраўдным упрыгожваннем горада. Напрыклад, канкурсанты з Чэрыкава пабудуюць кветкавы карабель, даўжыня якога складзе 4,5 метра. Кампазіцыя размесціцца ў адным з упадабаных месцаў адпачынку гараджан».

Пры ацэнцы работ удзельнікаў прафесійнае журы зверне ўвагу на адпаведнасць кампазіцыі праектнаму рашэнню, арыгінальнасць ідэі і яе граматнае ўвасабленне, уменне выкарыстоўваць рэльеф і спалучаць колеры, захаванне тэхналогіі пасадкі і многае іншае. Немалаважнае і прафесійнае чуццё, якое дазваляе з поўнасцю звычайных матэрыялаў ствараць сапраўдныя шэдэўры.

Практычныя навыкі па азеляненні тэрыторыі канкурсанты будуць пацвярджаць тэарэтычнымі ведамі па тэхніцы высадкі раслін і асновах іх догляду. Арганізатары ўпэўнены, што такое спалучэнне практыкі і тэорыі дазваляе рабочым зялёнага будаўніцтва з году ў год не толькі абменьвацца вопытам, але і павышаць свой прафесійны ўзровень.