У Магілёўскім раёне распачата рэканструкцыя аўтадарогі Р122 Магілёў – Чэрыкаў – Касцюковічы, паведаміў начальнік аддзела тэхнічнага нагляду і падрыхтоўкі вытворчасці РУП «Магілёўаўтадар» Павел Скрабуноў.

Праект рэалізуецца ў адпаведнасці з дзяржаўнай праграмай па развіцці і ўтрыманні аўтамабільных дарог. Ён прадугледжвае будаўніцтва бетоннай дарогі першай катэгорыі з дзвюма палосамі руху ў абодва бакі на пад’ездзе з боку Чавус у Магілёў. Працягласць рэканструяванага ўчастка складзе 5,5 км. Тут будзе таксама пабудавана два пуцеправоды, а ў раёне пасёлка Малая Бароўка два падземныя пешаходныя пераходы. Рашэнне аб рэканструкцыі дарогі прынята ў сувязі з павелічэннем інтэнсіўнасці руху і нагрузкі.

«Спецыялісты ўжо разлічылі канструкцыю дарогі пад інтэнсіўнасць і нагрузку руху з улікам перспектывы. Напрыклад, толькі верхні пласт бетоннага пакрыцця складзе 20 см, – сказаў Павел Скрабуноў. – Тэрмін службы бетонных дарог больш чым у два разы вышэйшы, чым асфальтабетонных, да таго ж, на іх няма абмежавання нагрузкі транспарту на дарожнае палатно».

Генпадрадчык ААТ «Дарожна-будаўнічы трэст №3» прыступіў да падрыхтоўчых прац: вынасу інжынерных канструкцый, расчыстцы дарожных палос. Будаваць саму бетонку пачнуць у 2019-м, а завяршыць усе работы плануецца ў 2020 годзе.

Рэканструкцыя будзе весціся з часовым абмежаваннем хуткаснага рэжыму руху транспарту па існуючай магістралі.

БЕЛТА