ААТ «Чырвоны харчавік» наладжвае пастаўкі прадукцыі ў Кітай. Пра гэта паведаміў памочнік дырэктара па ЗЭД прадпрыемства Дзяніс Бялянцаў.

Паводле яго слоў, першая партыя прысмакаў ад бабруйскага вытворцы – каля 3 т халвы – была адпраўлена ў Паднябесную ў чэрвені бягучага года. Наладзіць бесперабойны экспартны паток па маршруце «Бабруйск – Кітай» – адна з першарадных задач.

«Спажывецкі рынак Кітая настолькі актыўна развіваецца, што да сённяшняга дня КНР займае другі радок (пасля ЗША) па аб’ёме імпарту. У нас ужо ёсць вопыт экспартнага супрацоўніцтва з Ганконгам, – расказаў Дзяніс Бялянцаў. – Невялікімі, але правільнымі крокамі мы ідзём у патрэбным кірунку: дамагаемся ўстойлівай прысутнасці бабруйскіх прысмакаў на велізарным кітайскім рынку».

Дарэчы, тэхнолагі «Чырвонага харчавіка» актыўна працуюць над распрацоўкай прысмакаў, склад, смакавыя якасці і знешні выгляд якіх будуць ідэальна адпавядаць жаданням жыхароў Паднябеснай.