У Гомелі ў межах прафсаюзнага фестывалю «Працоўныя таленты» прайшоў фінал рэспубліканскага конкурсу прафесійнага майстэрства «Беларускі майстар-2018» па прафесіі цырульнік. У спаборніцтве прынялі ўдзел пераможцы абласных этапаў спаборніцтваў.

Ганаровым госцем конкурсу стаў старшыня Рэспубліканскага камітэта Беларускага прафсаюза работнікаў мясцовай прамысловасці і камунальна-бытавых прадпрыемстваў Сяргей Алейнікаў.

Юлія Мядзведзева з Бабруйскага дзяржаўнага тэхналагічнага каледжа, якая прадстаўляла Магілёўскую вобласць, заняла другое месца. Пераможцай стала гамяльчанка Паліна Галамазава. Дыплом за трэцяе месца забрала прадстаўніца Брэсцкага дзяржаўнага каледжа сферы абслугоўвання Марыя Грышкевіч. Усе майстры атрымалі прызы і дыпломы.

Па словах намесніка старшыні Магілёўскага абласнога камітэта галіновага прафсаюза Паўла Жуйкова, прафесійны ўзровень удзельнікаў конкурсу з кожным годам расце. «Ужо цяпер можна сказаць, што ўдзельнікі сур’ёзна і адказна рыхтуюцца да спаборніцтва. У гэтым мы пераканаліся яшчэ 11 сакавіка, праводзячы свой абласны этап конкурсу. Калі ў мінулым годзе прадстаўніца Магілёўскай вобласці ў рэспубліканскім фінале заняла 4-е месца, то ў гэтым ужо другое».