Лесапаляўнічыя гаспадаркі Магілёўскай вобласці за 2016 год зарабілі за кошт замежнага паляўнічага турызму Вr 217 тыс., што на Вr 55,5 тыс., ці на 34% больш у параўнанні з папярэднім годам. Пра гэта паведаміў галоўны паляўніцтвазнавец Магілёўскага дзяржаўнага вытворчага лесагаспадарчага аб’яднання Дзмітрый Панцялееў.

Даходы ад унутранага паляўнічага турызму і эксплуатацыі паляўнічых комплексаў вобласці склалі за мінулы год Вr 195 тыс. У асноўным паляваць і адпачываць у Магілёўскую вобласць едуць расейцы, а таксама ў мінулым годзе здабывалі трафейнага звера немцы, швейцарцы, палякі. Паляванне вялося ў асноўным на казуль, ласёў і высакародных аленяў.

“Разам з паляваннем мы актыўна прапаноўвалі замежным турыстам прагуляцца па экамаршрутах і экасцяжынах, паглядзець на цікавыя прыродныя аб’екты і гістарычныя славутасці. Такім чынам, упершыню на экатурызму мы зарабілі ў мінулым годзе Вr 6,4 тыс”, – сказаў Дзмітрый Панцялееў.

У лясгасах Магілёўскай вобласці з мэтай атрымання дадатковага даходу ад турызму распрацавана 130 км экалагічных маршрутаў і 14 км пешаходных экасцяжын. Да прыкладу, экамаршрут ў Быхаўскім лясгасе прадугледжвае наведванне каскаду крыніц «Захаранка», партызанскага мемарыяла, – гіганцкіх соснаў, гарадзішча ранняга жалезнага веку і іншых аб’ектаў. У Клімавіцкім лясгасе на экасцяжыне можна ўбачыць дубы-волаты, пазнаёміцца з лекавымі раслінамі, даведацца шмат цікавага аб пане Шацкім і яго сядзібе, а яркім фіналам падарожжа стане наведванне фазанарыя.

“Праца па развіцці сеткі турыстычных маршрутаў на тэрыторыі лясгасаў вобласці будзе працягнута з мэтай атрымання дадатковых сродкаў за кошт турызму, больш поўнай загрузкі і эфектыўнага выкарыстання наяўных у лясгасах дамоў паляўнiчага i паляўнічых комплексаў. Для развіцця паляўнічага турызму ў гэтым годзе ў Чавускім лясгасе будзе ўведзена ў карыстанне першая ў галіне вальерная паляўнічая гаспадарка, дзе можна будзе папаляваць на высакароднага аленя, а ў перспектыве на муфлона і лань”,– расказаў Дзмітрый Панцялееў.

БЕЛТА