Намеснік старшыні Пастаяннай камісіі па міжнародных справах Палаты прадстаўнікоў Вольга Петрашова, каментуючы бягучую грамадска-палітычную сітуацыю ў краіне, заклікала шанаваць дасягненні суверэннай Беларусі.

Вольга Петрашова адзначыла, што беларускі народ даражыць сваёй краінай. «Упэўнена, што ў Беларусі кожны, хто працуе і займае актыўную жыццёвую пазіцыю, мае ўсе магчымасці для самарэалізацыі», – сказала дэпутат.

Парламентарый падкрэсліла, што за гады незалежнасці Беларусі ўдалося дамагчыся значных дасягненняў у самых розных сферах. Асобна дэпутат спынілася на культуры і спорце. Яна нагадала, што своеасаблівымі візітнымі карткамі краіны стала нацыянальная бібліятэка з яе найбагацейшым зборам кніг, унікальныя спартыўныя аб’екты, якія дазваляюць беларусам прымаць спаборніцтвы міжнароднага ўзроўню.

Дэпутат звярнула ўвагу, што ў Дзень Незалежнасці беларусы з асаблівым пачуццём сустракаюцца на месцах баявой славы продкаў, каб ушанаваць іх подзвіг. «Пакуль мы памятаем цану таго, як нам давалася свабода і незалежнасць, мы будзем беражліва захоўваць і шанаваць тое, што маем сёння», – падагульніла Вольга Петрашова.

БЕЛТА