Чацвёртае свята «Дранік-фэст» адбудзецца ў Магілёве 29 верасня. Традыцыйна месцам правядзення мерапрыемства стане этнахутар «Зялёны гай». Пра гэта карэспандэнту сайта паведамілі ў Цэнтры гарадскіх ініцыятыў.

Як і ў мінулыя гады, у аснове фестывалю – конкурс на самае лепшае прыгатаванне дранікаў, якія стануць пачастункам для гледачоў. Заявіць на кулінарнае спаборніцтва сваю каманду могуць усе. Трэба сабраць ад 2 да 5 чалавек, запасціся бульбай у колькасці не меншай за мяшок, быць гатовым смажыць дранікі і частаваць імі гасцей свята. Пляцоўку, мангал і дровы ўдзельнікам дадуць бясплатна арганізатары.

Суразмоўцы дадалі, што на мерапрыемстве будзе ўручаны прыз «Залатая тарка» за самыя лепшыя дранікі ў аб’ектах грамадскага харчавання Магілёва. Таемныя наведвальнікі ўжо цяпер дэгустуюць стравы ва ўстановах горада.

Акрамя кулінарнай часткі, на фестывалі прадугледжана забаўляльная праграма, якая ўключае жывую музыку, танцы, конкурсы, незвычайныя выставы, майстар-класы па роспісе і выразанні фігур з бульбы і інш.

Жадаючыя далучыцца ў камандзе «Дранік-фэста» ў якасці валанцёра, удзельніка конкурсу, артыста, спонсара або ў іншай ролі могуць напісаць арганізатарам з дапамогай формы зваротнай сувязі на сайце dranikfest.by.

Арганізатарамі свята выступаюць Цэнтр гарадскіх ініцыятыў і Магілёўскі дзяржаўны ўніверсітэт харчавання.

Пачатак фэсту – 12.00.