Дваццатая міжрэгіянальная сустрэча воінаў-інтэрнацыяналістаў Бялыніцкага, Круглянскага, Магілёўскага і Шклоўскага раёнаў, прысвечаная 29-й гадавіне вываду савецкіх войскаў з Афганістана, пройдзе 9 лютага ў Шклове. Пра гэта паведамілі ў райвыканкаме.

У мерапрыемстве прымуць удзел ветэраны афганскай вайны, родныя і блізкія загінулых, прадстаўнікі выканаўчай і заканадаўчай улады, грамадскасць і моладзь. Урачысты мітынг з ускладаннем кветак і вянкоў пройдзе ля мэмарыяльнага комплексу «Памяць».

Працягнецца сустрэча шэсцем воінаў-інтэрнацыяналістаў па вуліцы Савецкай з партрэтамі загінулых і памерлых братоў па зброі чатырох раёнаў. Ля аўтавакзала запланаваны паказальныя выступленні ваеннаслужачых 103-й асобнай мабільнай брыгады горада Віцебска, а па вуліцы будзе рухацца ваенная тэхніка: бронетранспарцёр і баявая разведвальна-дазорная машына.

У раённым Доме культуры пройдзе ўрачыстае ўшанаванне, узнагароджанне і канцэртная праграма для воінаў-інтэрнацыяналістаў. Акрамя таго, тут арганізуюць фотаэкспазіцыю і выставу асабістых рэчаў воінаў, прадметаў іх захапленняў.

Праграмай сустрэчы таксама прадугледжаны турнір па валейболе і міні-футболе, спаборніцтвы па шматбор’і і інш.

Аналагічныя мерапрыемствы памяці пройдуць 15 лютага ва ўсіх гарадах і раёнах вобласці.

Праз вайну ў Афганістане прайшлі 3,5 тыс. ураджэнцаў рэгіёна, 118 з іх загінулі, 220 засталіся інвалідамі. Амаль 2 тыс. воінаў узнагароджаны за мужнасць і гераізм ордэнамі і медалямі, а выхаванец Магілёўскага сельскага прафтэхвучылішча імя К. П. Арлоўскага (сёння Магілёўскі дзяржаўны ордэна Працоўнага Чырвонага Сцяга прафесійны агралесатэхнічны каледж імя К. П. Арлоўскага) Андрэй Мельнікаў пасмяротна ўдастоены звання Героя Савецкага Саюза.