У Крычаве і Бабруйску ў першым квартале 2018 года адкрыюць швейныя вытворчасці прыватнага ўнітарнага прадпрыемства «Шарм Прэм’ер». Тут будзе працаваць расійская маладзёжная лінія адзення «Тваё», паведаміла дырэктар прадпрыемства Таццяна Андрушчышына.

У Крычаве вытворчы ўчастак разгорнецца на арандуемых свабодных плошчах філіяла «Крычаўскі завод гумавых вырабаў» ААТ «Белшына». Ужо закуплена самае сучаснае швейная і трыкатажнае абсталяванне, вядзецца падрыхтоўка і навучанне швей. Вытворчасць плануецца запусціць 29 студзеня. Тут будзе створана каля 350 працоўных месцаў, а магутнасць вытворчасці складзе каля 300 тыс. адзінак гатовых вырабаў у месяц.

Аналагічная вытворчасць будзе ўведзена ў эксплуатацыю ў сакавіку ў Бабруйску на арандаваных плошчах. Тут плануецца стварыць каля 240 працоўных месцаў і выпускаць штомесяц каля 200 тыс. адзінак вырабаў. «Прадукцыя будзе рабіцца з давальніцкай сыравіны і экспартавацца ў Расію. Першапачаткова яна будзе паступаць на склады ў падмаскоўны Чэхаў, адкуль размяркоўвацца ў гандлёвую сетку ТАА «Тваё», у тым ліку і ў Беларусь, дзе на сённяшні дзень ужо налічваецца каля 40 фірменных магазінаў», – сказала Таццяна Андрушчышына.

Яна падкрэсліла, што Магілёўская вобласць для размяшчэння буйных швейных вытворчасцяў выбрана не выпадкова – перш за ўсё інвестараў прыцягнулі спрыяльныя ўмовы для працы, наяўнасць кваліфікаваных кадраў, добрая лагістыка і блізкасць да расійскай мяжы.

На новых вытворчасцях будзе вырабляцца адзенне для моладзі, у асноўным футболкі, штаны, спадніцы, шорты, джэмперы, брыджы, пола, майкі.

Прадпрыемства «Шарм Прэм’ер» (Баранавічы, даччынае прадпрыемства Смаленскай трыкатажнай фабрыкі «Шарм», уваходзіць у склад холдынгу «Рускі трыкатаж») працуе ў Беларусі з 2006 года. За гэты час арганізаваны 3 цэхі, дзе на сёння працуе 236 швачак, а ўсяго створана 360 працоўных месцаў. Прадпрыемства выпускае каля 250 тыс. адзінак вырабаў у месяц. У снежні 2017 года пачаў працу вытворчы ўчастак «Шарм Прэм’ер» у Віцебску.

БЕЛТА