Семінар для дзяржаўных сродкаў масавай інфармацыі Магілёўскай вобласці «Рэгіянальныя СМІ ў эпоху лічбавізацыі: фарматы і канкурэнтаздольнасць на медыярынку» пройдзе сёння ў Горках. Пра гэта паведамілі ў Міністэрстве інфармацыі.

У мерапрыемстве прымуць удзел прадстаўнікі кіраўніцтва Адміністрацыі Прэзідэнта Рэспублікі Беларусь, Мінінфарма, мясцовага самакіравання, начальнікі галоўных упраўленняў ідэалагічнай работы, культуры і па справах моладзі аблвыканкамаў, кіраўнікі дзяржаўных рэгіянальных сродкаў масавай інфармацыі і журналісты, прадстаўнікі факультэта журналістыкі БДУ, запрошаныя эксперты ў сферы камунікацый.

Праграмай семінара прадугледжана абмеркаванне пытанняў дзейнасці рэдакцый, правядзенне трэнінгаў і майстар-класаў. Так, прадстаўнік кампаніі «Яндэкс» раскажа аб арганізацыі працы рэдакцый СМІ на інтэрнэт-пляцоўках. Кандыдат філалагічных навук, дацэнт кафедры медыялогіі і вэб-журналістыкі факультэта журналістыкі БДУ Аляксандр Градзюшка выступіць з дакладам «Інтэрнэт-рэсурсы як эфектыўны інструмент фарміравання грамадскай думкі». Старшы выкладчык факультэта журналістыкі БДУ Дзмітрый Сіняўскі раскажа пра тэндэнцыі дызайну і тэхналогій вытворчасці рэгіянальных СМІ. Начальнік фінансава-эканамічнага аддзела Міністэрства інфармацыі Вольга Мурашова дасць тлумачэнні па пытанні ўмоў аплаты працы работнікаў рэдакцый СМІ, якія ўводзяцца ў дзеянне з 1 студзеня 2020 года.

Арганізатарамі мерапрыемства выступаюць Міністэрства інфармацыі Рэспублікі Беларусь, Магілёўскі аблвыканкам, Горацкі райвыканкам.