Эканоміка Магілёўскай вобласці развіваецца стрыманымі тэмпамі. Пра гэта паведаміў сёння намеснік старшыні аблвыканкама Руслан Страхар падчас пасяджэння, дзе разглядаліся вынікі сацыяльна-эканамічнага развіцця рэгіёна за 9 месяцаў бягучага года.

Пры гэтым ён падкрэсліў, што назіраецца істотнае паляпшэнне фінансавых вынікаў у цэлым па вобласці: з 6 ключавых паказчыкаў выканана тры. Не ўдалося дасягнуць заданні па працаўладкаванні грамадзян на зноў створаныя працоўныя месцы. Не выкананы абагульняльны паказчык развіцця рэгіёна: тэмп росту ВРП склаў 100,1 % пры заданні 103,1 %. Адпаведна мінусуе вытворная ад яго – прадукцыйнасць працы па ВРП.

Захоўваецца істотная дыферэнцыяцыя па прадукцыйнасці працы паміж суб’ектамі гаспадарання розных формаў уласнасці, паведаміў Руслан Страхар. Асноўная прычына – затратнасць арганізацый дзяржсектара, а таксама нізкая аддача ўкладзеных сродкаў на правядзенне мадэрнізацыі. Так, на асобных прадпрыемствах апошняя не прывяла да ўкаранення перадавых тэхналогій, а абмежавалася ў асноўным заменай састарэлага абсталявання. У выніку рэалізаваныя праекты не прынеслі жаданай аддачы, а арганізацыі сутыкнуліся з цяжкасцямі абслугоўвання, пагашэння крэдытаў і пазык. У выніку недахоп абаротных сродкаў стаў адной з прычын зніжэння аб’ёмаў вытворчасці, інвестыцыйнай актыўнасці і эфектыўнасці працы асобных прадпрыемстваў. У той жа час прыватны сектар сёння з’яўляецца найбольш эфектыўным сегментам эканомікі. Дзякуючы яму на працягу трох гадоў назіраецца рост прамысловай вытворчасці.

Ёсць над чым працаваць у сельскай гаспадарцы, дзе адзначаецца неадпаведнасць прагназуемым параметрам, у першую чаргу, у жывёлагадоўлі. І асноўная прычына тут – зніжэнне прадуктыўнасці жывёл, іх колькасці. Лепшая сітуацыя ў раслінаводстве. Вытворчасць збожжа павялічылася на 2,2 %, рапсу – на 9,2 %, цукровых буракоў – на 23,2 %. Толькі жорсткая тэхналагічная дысцыпліна, рацыянальнае выкарыстанне кармоў, павышэнне адказнасці кадраў могуць садзейнічаць выпраўленню сітуацыі, упэўнены Руслан Страхар.

Неабходная актывізацыя работы па асваенні ўсіх выдзеленых сродкаў у межах дзяржпраграм, забеспячэнне ў поўным аб’ёме ўводу ў эксплуатацыю жылля, запланаваных аб’ектаў у сферы будаўніцтва.

Вынікі студзеня-верасня сведчаць аб значным павелічэнні інвестыцый у асноўны капітал. За 9 месяцаў іх выкарыстана амаль Br 1,4 млрд. з тэмпам росту 110,4 %. Станоўчая дынаміка назіраецца і па прамых замежных інвестыцыях на чыстай аснове, якіх, па аператыўнай інфармацыі, за гэты перыяд паступіла $ 97 млн. пры заданні $ 62 млн. Ільвіную долю ўнеслі рэзідэнты СЭЗ «Магілёў» – больш за $ 70 млн.

На сённяшні дзень у стадыі рэалізацыі знаходзіцца 43 інвестыцыйныя праекты. На іх выкананне ўжо накіравана больш за Br 1 млрд. У 2019 годзе заключана 10 новых інвестыцыйных дагавораў з аб’ёмам інвестыцый Br 80 млн. На думку Руслана Страхара, важна падтрымліваць дыялог з бізнесам канкрэтнага рэгіёна. Станоўчым прыкладам у гэтых адносінах можа быць Магілёўскі райвыканкам, які з прыходам новага кіраўніка ў сціслыя тэрміны правёў першы мясцовы інвестыцыйны форум. Мерапрыемства дазволіла прэзентаваць магчымасці рэгіёна, азнаёміць з яго патэнцыялам. Намеснік старшыні прапанаваў аб’яднаць намаганні сямі раёнаў паўднёвага ўсходу Магілёўшчыны для правядзення пры падтрымцы аблвыканкама аналагічнага мерапрыемства.  

Руслан Страхар таксама дадаў, што ў вобласці захоўваецца станоўчая дынаміка рознічнага тавараабароту, аб’ём якога за 9 месяцаў перавысіў Br 3 млрд., а тэмп росту склаў 104,4 % пры заданні 103,5 %.

Гаворачы аб знешнегандлёвым тавараабароце, намеснік старшыні канстатаваў істотнае паляпшэнне сітуацыі па экспарце за 2-і і 3-і кварталы бягучага года. Па 8 месяцах тэмп росту зафіксаваны ў 107,4 % пры заданні 104,8 %. Знешнегандлёвае сальда склалася станоўчае – у памеры $ 218 млн. Гэтаму спрыяла, у ліку іншых, праца па імпартазамяшчэнні, якая праводзіцца ў вобласці. Камунальныя прадпрыемствы і асобы без ведамаснай падпарадкаванасці вырабілі імпартазамяшчальнай прадукцыі на $ 335 млн. Пры гэтым больш за трэць адгружана на экспарт. Па выніках года плануецца перавысіць планку ў $ 600 млн. і каля 50% накіраваць за мяжу.

Руслан Страхар звярнуў увагу на пастаўленыя ўрадам Беларусі задачы аб размеркаванні экспартных паставак па трох сегментах сусветнага рынку. «Даручана павялічыць аб’ёмы экспарту прадукцыі ў краіны ЕС і дальняй дугі, прыняць меры па асваенні новых рынкаў, – падкрэсліў ён. – Пакуль доля ЕАЭС складае 67,8 %, ЕС – 22,4 %, астатніх краін – 9,8 %. Экспарт у краіны Еўразійскага эканамічнага саюза ў бягучым годзе павялічыўся на 12,5 %. Доля паставак у Еўрапейскі саюз знізілася на 3,1 %».

Разам з тым, на думку Руслана Страхара, варта пагадзіцца з аргументамі экспарцёраў, перш за ўсё перапрацоўшчыкаў сельгаспрадукцыі, што расійскі рынак сёння з’яўляецца прэміяльным. Калі на шалі ляжаць эканамічная эфектыўнасць і дыверсіфікацыя экспарту, то выбар відавочны на карысць першай. У той жа час, існуе разуменне, што дыверсіфікацыя павінна быць, таму праца ў гэтым кірунку праводзіцца. Адзначаецца рост паставак у Германію на 17 %, Літву – на 16 %, Францыю – у 2,7 раза, Швецыю – у 1,4 раза. У сувязі з гэтым структурным падраздзяленням аблвыканкама, холдынгу «Мясамалпрам», СЭЗ «Магілёў», гаррайвыканкамам падчас пасяджэння была пастаўлена задача вызначыць найбольш прыярытэтныя рынкі збыту ў краінах Еўрапейскага Саюза і дальняй дугі, сфармаваць спісы міжнародных спецыялізаваных выстаў у гэтых дзяржавах на 2020 год, каб з дапамогай пасольстваў і МЗС забяспечыць удзел у іх нашых вытворцаў.

Па выніках 9 месяцаў у рэгіёне назіраецца станоўчая дынаміка і па росце экспарту паслуг – тэмп 128,9 % пры заданні 103,6 %. Адзначаецца станоўчае сальда – $ 18 млн. Пераважна аб’ём экспарту фарміруецца транспартнымі паслугамі, якія складаюць больш за 60 % у яго структуры. Руслан Страхар звярнуў увагу на неабходнасць максімальна задзейнічаць у гэтым кірунку патэнцыял турыстычных паслуг. Тут трэба зрабіць упор на самых блізкіх суседзяў. «У сувязі з увядзеннем санкцый там актыўна развіваецца і прапагандуецца экатурызм і адпачынак на роднай прыродзе, куды традыцыйна адносіцца і Беларусь, – сказаў намеснік старшыні. – Варта актывізаваць працу па папулярызацыі прапаноў нашага аграэкатурызму, санаторыяў і ў наступныя зімовыя святы задзейнічаць гэту сферу па максімуме».

У ліку станоўчых тэндэнцый Руслан Страхар таксама назваў скарачэнне колькасці стратных арганізацый, выкананне па выніках 8 месяцаў задання па росце сярэднямесячнай заработнай платы, якая склала Br 874,8. У рэальным выражэнні яна павялічылася амаль на 6 %.

На 2020 год усімі рэгіёнамі Магілёўскай вобласці распрацаваны і зацверджаны комплексныя планы сацыяльна-эканамічнага развіцця, якія ўключаюць штомесячныя графікі па выхадзе на запланаваныя параметры з увязкай да росту прадукцыйнасці працы. Іх выкананне возьмуць на кантроль ужо са студзеня, удакладніў Руслан Страхар.

У сваю чаргу, каментуючы сітуацыю, якая склалася ў рэгіёне, старшыня Магілёўскага аблвыканкама Леанід Заяц падкрэсліў неабходнасць цеснага ўзаемадзеяння камітэта эканомікі аблвыканкама і намеснікаў кіраўнікоў па эканамічных пытаннях прадпрыемстваў і арганізацый. Такое індывідуальнае выбудоўванне стратэгій развіцця, дэталёвая прапрацоўка пытанняў, якія ўплываюць на невыкананне пунктаў складзеных бізнес-планаў, будуць найбольш плённымі. Недапушчальна, на думку кіраўніка рэгіёна, працаваць са стратамі ў будаўнічай галіне. Тут таксама неабходны выразны і жорсткі кантроль, уменне кіруючых кадраў паглыбіцца ў праблемы падведамасных арганізацый.