XI адкрыты фестываль творчасці замежных студэнтаў «Дружба народаў» адбудзецца 17-18 мая ў Беларуска-Расійскім універсітэце. Аб гэтым паведамілі ва ўстанове адукацыі.

Творчыя здольнасці прадэманструе каля 40 прадстаўнікоў пяці беларускіх вышэйшых навучальных устаноў з Азербайджана, Туркменістана, Таджыкістана, Казахстана, Кітая, Конга, Ганы і Грэцыі. Завочна прыме ўдзел у форуме моладзь з Новасібірскага дзяржаўнага тэхнічнага ўніверсітэта. Студэнты знялі на відэа сваё выступленне, якое гледачы і журы ўбачаць на экране.

Канкурсанты будуць змагацца за перамогу ў намінацыях: «Вакальна-харавая творчасць», «Інструментальная, вакальна-інструментальная творчасць», «Харэаграфічнае мастацтва», «Тэатральнае мастацтва». Дадаткова Маладзёжнай садружнасцю «Спадчына» Рускага культурна-асветніцкага таварыства заснаваны спецыяльны прыз «За найлепшае выкананне песні на рускай мове» і «За найлепшае выкананне песні на беларускай мове».

Узнагароджанне пераможцаў адбудзецца 18 мая падчас гала-канцэрта. Плануецца, што ў цырымоніі прыме ўдзел галоўны спецыяліст Прадстаўніцтва Рассупрацоўніцтва ў Рэспубліцы Беларусь Яўгенія Субоціна.

У рамках фестывалю таксама адкрыецца выстава «Свет ЕАЭС» і экспазіцыя цвярскіх мастакоў «На адной зямлі».

Фестываль «Дружба народаў» праводзіцца на базе БРУ з 2008 года. Асноўная мэта спаборніцтва – устанаўленне новых творчых кантактаў паміж студэнтамі розных краін, нацыянальнасцей, распаўсюджванне і адраджэнне нацыянальных традыцый.