Заключны тур конкурсу ваенных духавых аркестраў Узброеных Сіл і транспартных войскаў адбудзецца 22 верасня ў Бабруйску. Пра гэта паведамілі ў гарвыканкаме.

У конкурснай праграме выступяць 14 ваенных аркестраў: 120-й асобнай гвардзейскай механізаванай брыгады Паўночна-заходняга аператыўнага камандавання; 11-й асобнай гвардзейскай механізаванай брыгады Заходняга аператыўнага камандавання; Бабруйскай, Баранавіцкай і Брэсцкай ваенных камендатур; 51-й гвардзейскай артылерыйскай брыгады; 103-й асобнай гвардзейскай паветрана-дэсантнай брыгады; 30-й асобнай чыгуначнай брыгады транспартных войскаў; Мінскага сувораўскага ваеннага вучылішча; 5-й асобнай брыгады спецыяльнага прызначэння; 6-й асобнай гвардзейскай механізаванай брыгады Заходняга аператыўнага камандавання; ганаровай варты Мінскай ваеннай камендатуры; Ваеннай акадэміі Беларусі, дзяржаўнай установы «Узорна-паказальны аркестр Узброеных Сіл Рэспублікі Беларусь». Гледачоў чакаюць непаўторныя выступленні: удзельнікі паспаборнічаюць у выкананні службова-страявога рэпертуару.

Мерапрыемства пачнецца на плошчы Леніна ў 14.00 з параду пад старадаўні марш «Грэнадзёр». Пасля дэманстрацыі навыкаў і цырымоніі ўзнагароджання пераможцаў, у 17.00, пачнецца канцэрт заслужанага калектыву «Узорна-паказальны аркестр Узброеных Сіл Рэспублікі Беларусь».

Падобныя творчыя спаборніцтвы праводзяцца штогод з мэтай вызначэння ўзроўню падрыхтоўкі ваенных аркестраў. Яны дапамагаюць набірацца вопыту і пераймаць усё самае лепшае адзін у аднаго. Як правіла, конкурсы чаргуюцца: у адзін год правяраецца выкананне аркестравага рэпертуару, а ў другі – пляц-канцэрта, службова-страявога рэпертуару.