У Слаўгарадзе 30 красавіка пройдзе VI Гастранамічны фестываль «Гаспадарчы сыр», паведамілі ў аргкамітэце мерапрыемства.

Цэнтральнай падзеяй кулінарнага свята стане па традыцыі кірмаш-продаж хатніх сыроў з дэгустацыямі, майстар-класамі і розыгрышамі. На ім мясцовыя сыравары прадставяць свае калекцыі больш за 50 відаў натуральных сыроў на любы густ: цвёрдыя і мяккія, плаўленыя і тварожныя, сулугуні і брынза, сырніца і сырныя аладкі, салодкія і салёныя, з рознымі прыправамі і напаўняльнікамі. Прадукцыя рамеснікаў і іх майстар-класы чакаюць гасцей на «Вуліцы майстроў», прыемна пацешыць і пляцоўка аграэкатурыстычнай вёскі сваімі пачастункамі, сувенірнай прадукцыяй, катаннем на конях і знаёмствам з хатнімі жывёламі.

Арганізатары рыхтуюць цікавую анімацыйна-забаўляльную праграму з канцэртам мясцовых творчых калектываў і выканаўцаў, тэматычнымі экскурсіямі, гульнямі і конкурсамі. Яшчэ адной адметнасцю свята стане забаўляльная праграма з дыскатэкай на кемпінг-пляцоўцы аграсядзібы «Забава» ў в. Аляксандраўка. Тут гасцей будуць частаваць юшкай і шашлыкамі, парыць у паходнай лазні, прапануюць пешаходныя і конныя прагулкі, а таксама начлег у палатачным гарадку.

Напярэдадні кулінарнага свята, 29 красавіка, у Слаўгарад на турыстычны кірмаш запросяць прадстаўнікоў беларускіх тураператараў, якія спецыялізуюцца на ўнутраным турызме. Ім раскажуць аб турыстычных магчымасцях і патэнцыяле Слаўгарадскага раёна, прэзентуюць аўтобусны тур «Ад Прупоя да Слаўгарада» з наведваннем помніка прыроды рэспубліканскага значэння Блакітная крыніца, мемарыяльнага комплексу ў в. Лясная, Замкавай гары ў Слаўгарадзе і іншых аб’ектаў. А 30 красавіка госці з розных рэгіёнаў краіны прымуць удзел у фестывалі «Гаспадарчы сыр».

Арганізатарамі фестывалю выступаюць Слаўгарадскі раённы выканаўчы камітэт і мясцовы фонд развіцця сельскіх тэрыторый «Адраджэнне-Агра».