У Асіповічах 29-30 верасня пройдзе адкрыты Кубак Беларусі па матацыклетным кросе. Пра гэта карэспандэнту сайта паведамілі ў Магілёўскай абласной арганізацыйнай структуры ДТСААФ.

На мотакросавай трасе ў мікрараёне «БАМ» сваё майстэрства прадэманструе больш за 100 гоншчыкаў з Беларусі, Расіі, Літвы і Украіны. Як адзначылі арганізатары, падобнага спаборніцтвы ў Асіповічах не праводзілі ўжо каля сямі гадоў.

У першы дзень Кубка адбудзецца ўрачыстае адкрыццё спаборніцтваў і заезды класаў 50, 65, 125 куб. см (юнакі), «Пачатковец», «Нацыянал» і «Ветэран». 30 верасня пройдуць мотабаталіі ў класах 85, 125 куб. см (мужчыны), «Open», «Open В» і «Матацыкл з каляскай». Цырымоніі ўзнагароджання пераможцаў і прызёраў будуць праходзіць у канцы кожнага спаборніцкага дня.

Арганізатарамі спаборніцтваў выступаюць ГА «Беларуская федэрацыя матацыклетных відаў спорту», Магілёўская абласная арганізацыйная структура ДТСААФ, Асіповіцкая раённая арганізацыйная структура ДТСААФ пры падтрымцы Асіповіцкага выканаўчага камітэта.