Хрэсны ход з Магілёва ў Бялынічы – у гонар Святога Вялікадня і свята іконы Божай Маці Бялыніцкай зробяць 30 красавіка паломнікі. Пра гэта паведамілі ў Магілёўскай епархіі Беларускай Праваслаўнай Царквы.

Рух пачнецца ў 7.30 ад сабора Трох Свяціцеляў і пройдзе па трасе Магілёў – Мінск. Па дарозе праваслаўныя вернікі і святары наведаюць храм іконы Божай Маці Усецарыца ў мікрараёне Казіміраўка. Шлях працэсіі будзе пралягаць праз населеныя пункты Сумарокава, Княжыцы, Ермалавічы, Вішова, Нежкава, Камяніца, Свяцілавічы, Запакулле. Увечары, пераадолеўшы каля 40 км, паломнікі завершаць шэсце ў храме ў гонар Бялыніцкага абраза Божай Маці ў Бялынічах. На наступны дзень тут адбудзецца літургія і сустрэча архіерэя.