Інфармацыйныя тэхналогіі шырока ўжываюцца ў розных сферах жыццезабеспячэння насельніцтва Магілёўшчыны. Пра гэта паведаміў начальнік упраўлення справамі аблвыканкама Віталь Ігнатовіч, выступаючы на трыццатай сесіі абласнога Савета дэпутатаў.

Паводле яго слоў, 21 мая 2017 года ў Пасланні беларускаму народу і Нацыянальнаму Сходу Прэзідэнт Аляксандр Лукашэнка вылучыў як адзін з асноўных пунктаў росту паўсюднае ўкараненне новых інфармацыйных тэхналогій. Кіраўнік дзяржавы заклікаў актыўна іх выкарыстоўваць у сферы бытавых паслуг, гандлю, у жыллёва-камунальнай гаспадарцы, на транспарце, скарачаць папяровы дакументаабарот за кошт прымянення тэхналогій электроннага ўрада. «Магілёўская вобласць актыўна працуе ў гэтым напрамку: інфармацыйныя тэхналогіі шырока прымяняюцца ў ахове здароўя, адукацыі, банкаўскай і іншых сферах. Ва ўжытак увайшлі электронны рэцэпт, карта, школьны дзённік, банкінг», – падкрэсліў Віталь Ігнатовіч.

Калі гаварыць пра ўкараненне інфармацыйных тэхналогій у сферы дзяржаўнага кіравання, то маецца на ўвазе электронны ўрад. «Ён дапамагае аказваць дзяржпаслугі насельніцтву пераважна ў электроннай форме, – удакладніў начальнік упраўлення справамі аблвыканкама. – Напрыклад, дзейнічаюць праграмныя комплексы «Адно акно», «Вядзенне чаргі на паляпшэнне жыллёвых умоў», модулі «Улік апекуноў», «Камісія па справах непаўналетніх» і іншыя».

Установы адукацыі вобласці таксама ўключаюць у працу сучасныя тэхналогіі. Сярод іх – сэрвіс «Электронны дзённік / электронны часопіс». Найбольш актыўна яго выкарыстоўваюць у 19 навучальных установах Магілёва, Шклоўскага і Клімавіцкага раёнаў. У найбліжэйшы час ён з’явіцца ў Бабруйску, Бялыніцкім, Быхаўскім, Крычаўскім, Клічаўскім, Мсціслаўскім і Асіповіцкім раёнах.

Гаворачы аб інфарматызацыі ва ўстановах аховы здароўя, Віталь Ігнатовіч адзначыў тут актыўную працу па стварэнні электронных рэцэптаў і картаў. На 9 кастрычніка 2017 года ў Магілёве выдадзена 33,5 тыс. электронных картаў і выпісана 46 тыс. электронных рэцэптаў, у Бабруйску – 10 тыс. і 18 тыс. адпаведна.

Галоўную ролю ў развіцці тэлекамунікацыйнай структуры іграе Магілёўскі філіял РУП «Белтэлекам». Згодна з Дзяржаўнай праграмай развіцця лічбавай эканомікі і інфармацыйнага грамадства на 2016-2020 гады прадпрыемства праводзіць мерапрыемствы, якія дазваляюць палепшыць якасць прадстаўляемых насельніцтву паслуг. У прыватнасці, пачалася заменена старых сетак электрасувязі на больш сучасныя, павялічана колькасць пунктаў доступу Wi-Fi у месцах агульнага карыстання. Акрамя таго, плануецца будаўніцтва валаконна-аптычных ліній з прымяненнем пасіўных аптычных тэхналогій GPON і ўкараненне ў існуючыя, будуюцца жылыя дамы і грамадскія будынкі тэхналогіі «Разумны дом». «Карыстальнік апошняй паслугі зможа аддалена кіраваць рознымі сістэмамі і прыборамі ў сваім жыллі. Напрыклад, ажыццяўляць клімат-кантроль, відэаназіранне, збіраць паказанні лічыльнікаў вады, газу, электраэнергіі. На 1 верасня да паслугі ў рэгіёне ўжо падключана больш за 1,2 тыс. абанентаў», – удакладніў Віталь Ігнатовіч.

Начальнік упраўлення справамі аблвыканкама падкрэсліў, што ўсе запланаваныя і рэалізуемыя мерапрыемствы дазволяць Магілёўскай вобласці забяспечыць растучыя інфармацыйна-камунікацыйныя патрэбы грамадзян, бізнесу і дзяржавы.

Усяго на сесіі было разгледжана 16 пытанняў. Акрамя аналізу мер, якія прымаюцца выканаўчымі і распарадчымі органамі Магілёўскай вобласці па пабудове і развіцці ў грамадстве тэлекамунікацыйнай інфраструктуры, дэпутаты зацвердзілі рэгіянальныя комплексы мерапрыемстваў рэалізацыі Дзяржаўных праграм па развіцці і ўтрыманні аўтамабільных дарог у Рэспубліцы Беларусь на 2017-2020 гады, ўвекавечванні загінулых пры абароне Айчыны і захаванні памяці пра ахвяр войнаў на 2015-2020 гады. Былі таксама ўнесены змены і дапаўненні ў шэраг рашэнняў Магілёўскага абласнога Савета дэпутатаў.