Кабінет па асновах бяспекі адкрыўся на базе Цэнтра дадатковай адукацыі дзяцей і моладзі ў Клімавічах. Пра гэта паведамілі ў Магілёўскім абласным упраўленні МНС.

Для зручнасці навучэнцаў міні-цэнтр разбіты на некалькі зон, кожная з якіх прысвечана пэўнай тэме: «Куток ОСВОД», «Электрабяспека», «Медыцына» і іншыя. Разам са шматлікімі маляўнічымі нагляднымі дапаможнікамі і плакатамі тут размешчаны ўнікальныя прадметы, напрыклад, спецвопратка ратавальнікаў, манекены – тое, што можна памацаць, патрымаць у руках.

Першымі наведвальнікамі кабінета сталі падлеткі, якія адпачываюць у школьным лагеры СШ №3 Клімавіч.

Заняткі ў цэнтры будуць праходзіць як з самымі маленькімі жыхарамі раёна, так і са старэйшымі дзецьмі. Запланаваны і тэматычныя мерапрыемствы з бацькамі і дзецьмі. Праводзіць гутаркі па правілах пажарнай бяспекі, аказанні першай медыцынскай дапамогі будуць вопытныя педагогі, медработнікі, супрацоўнікі РАНС і РАУС.

Фота - Магілёўскае абласное ўпраўленне МНС