Спаборніцтвы па сучасным пяцібор’і сярод дзяўчынак і хлопчыкаў пройдуць 26 кастрычніка ў Магілёве. Пра гэта карэспандэнту сайта паведамілі ў абласным цэнтры алімпійскага рэзерву па конным спорце і сучасным пяцібор’і.

«Асаблівасць гэтага алімпійскага віду спорту заключаецца ў тым, што дзіцячыя турніры праводзяцца па праграме двухбор’я – у плаванні і бегу, – удакладнілі суразмоўцы. – Адкрываць сезон у сучасным пяцібор’і будзе даверана дзецям. Усе яны – юныя навучэнцы нашай установы. Некаторыя толькі-толькі прайшлі пачатковую падрыхтоўку ў басейнах і зараз вырашылі паспрабаваць сябе ў пяцібор’і. Менавіта так – праз першыя спаборніцтвы па плаванні і бегу – вядзецца адбор спартсменаў для сучаснага пяцібор’я».

За медалі пазмагаецца каля 100 атлетаў трох узроставых катэгорый: спартсмены 2006-2007 гадоў нараджэння (плаванне 100м, бег 800м); спартсмены 2008 года нараджэння (плаванне 50м, бег 400м); спартсмены 2009 года нараджэння (плаванне 25м, бег 400м).