XVIII адкрытыя рэспубліканскія спаборніцтвы па сучасным пяцібор’і на прызы ўпраўлення спорту і турызму Магілёўскага аблвыканкама пройдуць 18-20 кастрычніка ў горадзе на Дняпры. Пра гэта карэспандэнту сайта паведамілі ў абласным цэнтры алімпійскага рэзерву па конным спорце і сучасным пяцібор’і.

На спаборніцтвы, якія прымуць Дом спорту, СК «Алімпіец» і конны манеж, з’едзецца каля 120 спартсменаў-пяціборцаў з Мінска, Гомельскай, Брэсцкай, Магілёўскай абласцей, а таксама Украіны. Яны будуць змагацца ў дысцыплінах: пяцібор’е сярод юніёраў і юніёрак 1998 года нараджэння і маладзейшых, чатырохбор’і сярод дзяўчат і юнакоў 2001 года нараджэння і маладзейшых, трохбор’і сярод дзяўчат і юнакоў 2002 года нараджэння і маладзейшых.

«Кожнаму атлету прыйдзецца сутыкнуцца з мноствам цяжкасцяў, праявіць волю да перамогі і справіцца з эмоцыямі, каб заваяваць прызавыя месцы, – адзначылі суразмоўцы. – Жадаем усім удзельнікам бескампраміснай барацьбы, новых рэкордаў, а балельшчыкам – яркіх, відовішчных і запамінальных спаборніцтваў».

Праграма спаборніцтваў:

18 кастрычніка – плаванне, камбінаваны від (трохбор’е);

19 кастрычніка – фехтаванне, плаванне, камбінаваны від (чатырохбор’е, пяцібор’е);

20 кастрычніка – конны спорт (пяцібор’е).