Традыцыйны адкрыты рэспубліканскі турнір па скачках на батуце і акрабатычнай дарожцы Double Twist пройдзе 28-30 лістапада ў Палацы гімнастыкі Магілёва. Пра гэта паведамілі ў гарадской спецыялізаванай дзіцяча-юнацкай школе алімпійскага рэзерву «Багіма».

У спаборніцтвах прыме ўдзел каля 200 таленавітых дзяцей ва ўзросце ад 8 да 18 гадоў. Чакаецца, што гледачы змогуць ацаніць майстэрства самых моцных спартсменаў з Беларусі, Расіі, Украіны. Перамога ў турніры для некаторых з іх стане пропускам у нацыянальную зборную, а таксама дазволіць удзельнічаць у прэстыжных міжнародных спаборніцтвах.

На працягу турніру будуць разыграны 24 камплекты медалёў у трох узроставых групах. Таксама журы вызначыць пераможцаў у намінацыях «Найвышэйшы пілатаж» (за выкананне праграмы, якая мае самы высокі каэфіцыент цяжкасці сярод спартсменаў старэйшай і сярэдняй узроставых груп па скачках на батуце), «Double Twist» (за выкананне элемента найвышэйшай складанасці сярод спартсменаў старэйшай і сярэдняй узроставых груп па скачках на акрабатычнай дарожцы), «Самы юны ўдзельнік» і«Самая юная ўдзельніца».