Каля 200 юных музыкантаў Магілёўшчыны прымуць удзел у абласным адборачным этапе VIII Рэспубліканскага адкрытага конкурсу выканаўцаў на народных інструментах імя І. І. Жыновіча. Пра гэта карэспандэнту сайта паведамілі ў Магілёўскім дзяржаўным музычным каледжы імя М. А. Рымскага-Корсакава.

На сцэнах навучальнай установы 20-22 лютага будуць выступаць пераможцы гарадскіх і раённых этапаў творчага спаборніцтва. Навучэнцы гімназій-каледжаў мастацтваў, устаноў сярэдняй спецыяльнай адукацыі ў сферы культуры, дзіцячых школ мастацтваў рэгіёна будуць дэманстраваць свае навыкі ў дзвюх узроставых групах і намінацыях «Баян», «Акардэон», «Цымбалы», «Балалайка», «Домра-мандаліна», «Гітара». Самым таленавітым музыкам дадуць права абараняць гонар Магілёўшчыны на заключным этапе конкурсу, які пройдзе з 9 па 14 красавіка ў Лідзе.

«Конкурс імя І. І. Жыновіча сярод выканаўцаў на народных інструментах уваходзіць у лік найбольш прэстыжных у нашай краіне, – адзначылі суразмоўцы. – Праходзіць ён раз у тры гады. Усе ўдзельнікі сур’ёзна рыхтуюцца да гэтай падзеі. Тое, што вучань выйшаў на сцэну нават адборачнага тура конкурсу, – ужо вялікая перамога для педагога, бо гэта вынік працы не аднаго года».

Арганізатарамі рэгіянальнага адборачнага этапа конкурсу з’яўляюцца галоўнае ўпраўленне ідэалагічнай работы, культуры і па справах моладзі Магілёўскага аблвыканкама і Магілёўскі дзяржаўны музычны каледж імя М.А. Рымскага-Корсакава.