Каманда Магілёўскага прафесійнага электратэхнічнага каледжа атрымала перамогу ў абласной спартакіядзе моладзевых атрадаў аховы правапарадку «Акадэмія мужнасці». Пра гэта карэспандэнту сайта паведамілі ў АК ГА «БРСМ».

Другое месца заняла дружына Круглянскага раёна, трэцяе – Беларускай дзяржаўнай ордэнаў Кастрычніцкай рэвалюцыі і Працоўнага Чырвонага Сцяга сельскагаспадарчай акадэміі.

За права стаць найлепшымі змагалася 12 каманд з Магілёва, Бабруйска, Касцюковічаў, Горак, Чавус, Шклова, Круглага, Кіраўска, Асіповічаў, Магілёўскага раёна. Хлопцаў чакалі тэарэтычныя заданні, якія ўключаюць пытанні па прававой і медыка-санітарнай падрыхтоўцы. Спартыўная частка складалася з бегу на 100 м і 1000 м, стральбы з пнеўматычнай зброі, трохбор’я, кідання гранаты на дакладнасць і перацягвання каната.

Пераможцаў узнагародзілі дыпломамі і каштоўнымі прызамі.

Сёння ў Магілёўскай вобласці налічваецца 186 моладзевых атрадаў аховы правапарадку, якія аб’ядноўваюць 2680 байцоў. На рэспубліканскім этапе «Акадэміі мужнасці» каманда нашага рэгіёна не аднойчы станавілася пераможцай. Так, у 2017-м нашы хлопцы занялі на спаборніцтвах першае месца.