Летняя школа NEXT «Прыродныя рашэнні для разумных гарадоў» адкрыецца 15 жніўня ў Беларуска-Расійскім універсітэце. Пра гэта паведамілі ў прэс-службе БРУ.

Праект арганізаваны пры падтрымцы Міжнароднага Вішаградского фонду, праграмы Еўрапейскага Саюза Erasmus+ і ERA-NET Smart Urban Futures, праграмы Нямецкай службы акадэмічных абменаў (DAAD).

Удзельнікамі школы стане 46 студэнтаў, аспірантаў, навукоўцаў і прадстаўнікоў грамадскіх арганізацый з Германіі, Чэхіі, Венгрыі, В’етнама, Манголіі, Расіі, Індыі, ЗША, Канады, Украіны, Малдовы, Пакістана, Польшчы, Латвіі, Нідэрландаў, Бразіліі, Бангладэш і Беларусі, адабраныя з амаль 200 прэтэндэнтаў, якія даслалі заяўкі з 45 краін свету.

Рабочая мова школы – англійская. У якасці выкладчыкаў у школе прымуць удзел эксперты з Нідэрландаў, Італіі, Швецыі, Венгрыі, Славакіі, Расіі, Эстоніі, Чэхіі, Беларусі, Польшчы і Германіі, у тым ліку шэраг сусветна прызнаных спецыялістаў у галіне гарадскога планавання і кіравання.

«Важнай асаблівасцю гэтай летняй школы з’яўляецца тое, што значная частка яе ўдзельнікаў – спецыялісты з шырокім вопытам, многія з навуковымі ступенямі, – удакладнілі суразмоўцы. – Гэта ператварае летнюю школу ў паўнавартасную пляцоўку для абмену думкамі і вопытам, дзе няма выразнай мяжы паміж «студэнтамі» і «прафесарамі», і нават самі выкладчыкі разлічваюць даведацца шмат новага».

Інтэрнацыянальная каманда студэнтаў і выкладчыкаў будзе не толькі абмяркоўваць сучасныя тэорыі і канцэпцыі фарміравання зялёнай інфраструктуры і гарадскіх ландшафтаў, але і шукаць рашэнні для канкрэтных праблем, звязаных з развіццём зялёных прастор у Магілёве і яго прыгараднай зоне.

Вынікам заняткаў стануць інавацыйныя, заснаваныя на прыродных механізмах прапановы для развіцця зялёных зон горада – у раёне Пячэрскага возера, Падніколля, Буйнічаў, даліне ракі Дубравенкі.

«Мы не чакаем, што ўдзельнікі прапануюць дасканала прапрацаваныя і прыдатныя да неадкладнага ўкаранення ідэі і праекты. Тым не менш, каштоўная ўжо сама магчымасць абмеркаваць гарадскія праблемы такім шматнацыянальным калектывам, і атрымаць на іх «погляд з боку», – адзначылі ў БРУ.

Вынікі даследаванняў будуць даступныя ўсім зацікаўленым бакам, уключаючы праекціроўшчыкаў, мясцовыя ўлады і грамадскасць, і могуць быць выкарыстаны для рэальных мерапрыемстваў у Магілёве па далейшым развіцці зялёнага каркаса, павышэнні камфортнасці горада, паляпшэнні яго экалагічнага стану.