Незаконнае і нямэтавае расходаванне бюджэтных сродкаў у суме больш за Br23 тыс. выяўлена Камітэтам дзяржкантролю Магілёўскай вобласці падчас праверкі Чэрыкаўскай цэнтральнай раённай бальніцы. Пра гэта паведаміў намеснік старшыні камітэта Аляксей Іглікаў.

Як устанавілі кантралёры, установа не ў поўным аб’ёме аднаўляла панесеныя бюджэтныя выдаткі пры аказанні платных медыцынскіх паслуг, завышала ў бюджэтных каштарысах выдаткі на харчаванне пацыентаў, набывала не прадугледжаныя пры выдзяленні бюджэтных сродкаў расходныя матэрыялы да медыцынскага абсталявання.

Таксама выяўлены парушэнні пры ажыццяўленні дзяржаўных закупак, здачы ў арэнду маёмасці, цэнаўтварэнні.

Па выніках праверкі незаконна атрыманыя сродкі вернутыя ў бюджэт, да адміністрацыйнай адказнасці прыцягнутыя ўстанова і 6 яе службовых асоб, 15 работнікаў пакараны дысцыплінарна.