Камітэт дзяржаўнага кантролю Магілёўскай вобласці працягвае ажыццяўляць нагляд за ліквідацыяй недахопаў на малочна-таварнай ферме РУП «Вучгас БДСГА» ў аграгарадку Паршына Горацкага раёна. Пра гэта паведаміў начальнік упраўлення кантролю за працай аграпрамысловага і прыродаахоўнага комплексаў КДК Магілёўскай вобласці Вячаслаў Асмалоўскі.

«Яшчэ 23 ліпеня бягучага года Камітэтам зроблена абследаванне названай малочна-таварнай фермы, – адзначыў суразмоўца. – У ходзе наведвання выяўлены нясвоечасовы вываз гною з хлявоў, выгульных пляцовак і сховішчаў, абкошванне тэрыторыі, недахоп падсцілачнага матэрыялу, нездавальняльны стан даільнай залы (адбітая плітка, столь пакрыта цвіллю), неналежнае ветэрынарнае абслугоўванне жывёл. На МТФ мелася значная колькасць жывёл з высільваннем, хворымі капытамі і гінекалагічнымі захворваннямі. Як следства, не забяспечана эфектыўнае абнасеньванне каля 40% дойнага пагалоўя. У асобных індывідуальных доміках цялят ва ўзросце да трох месяцаў не мелася паілак і камбікорму ў кармушках».

Паводле слоў Вячаслава Асмалоўскага, неадкладна былі ўнесены прапановы аблвыканкаму і Горацкаму райвыканкаму для прыняцця мер па ліквідацыі выяўленых недахопаў. Таксама была звернута ўвага органаў улады на неабходнасць тэрміновага аказання прадпрыемству дапамогі ў лячэнні жывёл.

«Камітэтам ва ўстаноўленым парадку разглядаецца пытанне прыцягнення да адміністрацыйнай адказнасці вінаватых службовых асоб, – падкрэсліў Вячаслаў Асмалоўскі. – Да ацэнкі сітуацыі падключаны праваахоўныя органы».

Здымкі, зробленыя 23 ліпеня, калі ў гаспадарку прыйшлі кантралёры.