Кінапаказы фільмаў – удзельнікаў XXVI Мінскага міжнароднага кінафестывалю «Лістапад» – адбудуцца 21–27 лістапада ў Магілёве. Пра гэта паведамілі ў Магілёўскім дзяржаўным прадпрыемстве «Кінавідэапракат».

У кінатэатры «Радзіма» гледачы змогуць убачыць фэнтэзі-драму «Мысленны воўк» рэжысёра Валерыі Гай Германікі. Работа заваявала на кінафестывалі дыплом «За пашырэнне межаў візуальнага мастацтва кіно». Пройдзе дэманстрацыя фантастычнага фільма сумеснай вытворчасці Аўстрыі, Вялікабрытаніі і Германіі «Малы Джо» (рэжысёр Джэсіка Хаўснер). Будзе паказана французская драма «Партрэт дзяўчыны ў агні», рэжысёрам якой з’яўляецца Селін Сьяма. Усе стужкі, прывезеныя ў Магілёў, таксама з’яўляюцца ўдзельнікамі Канскага фестывалю 2019 года.

XXVI Мінскі міжнародны кінафестываль «Лістапад» прайшоў з 1 па 8 лістапада пад слоганам «Да радасці».