Магчымасці рэалізацыі ў Магілёўскай вобласці кітайска-беларускага інвестыцыйнага праекта па вырошчванні і перапрацоўцы льновалакна абмеркаваны ў правінцыі Цзянсу, паведамілі ў генконсульстве Беларусі ў Шанхаі.

Гэтыя пытанні ў ліку іншых разглядаў генеральны консул Беларусі ў Шанхаі Валерый Мацэль падчас паездкі ў названую правінцыю. У прыватнасці, тэма развіцця льнаводчай галіны была ў цэнтры ўвагі на яго сустрэчы з намеснікам генеральнага менеджара кампаніі SUMEC Textile У Вэйфэнам. Бакі дэталёва абмеркавалі магчымасці ажыццяўлення праекта сумесна Беларуссю і Кітаем.

Аб наладжванні ўзаемавыгаднага супрацоўніцтва з беларускімі навуковымі арганізацыямі, а таксама прадпрыемствамі ішла размова на перагаворах Валерыя Мацэля з прэзідэнтам кампаніі Giant Light Technology Metal (г. Куншань).

Акрамя таго, кіраўнік генеральнага консульства прыняў удзел і выступіў на арганізаванай Цзянсускай групавой кампаніяй JOC (г. Нанкін) цырымоніі сустрэчы першай партыі беларускай ялавічыны, якая паступіла на рынак КНР, і даў інтэрв’ю журналістам тэлерадыёкампаніі правінцыі Цзянсу і медыягрупы Сіньхуа Daily.

БЕЛТА