Электробусы – падарунак кітайскай правінцыі Хунань да 750-годдзя Магілёва – праходзяць абкатку на вуліцах абласнога цэнтра.

«Гэта доўгачаканы момант, – падзяліўся ўражаннямі дырэктар тралейбуснага парка Сяргей Манастырэнка. – Нямала часу займаліся працэдурамі па афармленні электробусаў, прайшлі ўсё, што прапісана заканадаўствам, у тым ліку тэхнічны агляд машын, і зараз гатовы для працы на маршруце».

Аднак па тэхумовах эксплуатацыі электробуса, неабходна прайсці невялікую абкатку без пасажыраў працягласцю 500 км, і толькі потым можна выйсці на маршрут. Гэта працэдура робіцца для таго, каб выявіць слабыя месцы, магчымыя няспраўнасці.

Папярэдне ўзгоднены маршрут №4. Працаваць электробусы будуць толькі ў адну змену. «Ужо бачым, машына эканамічна выгадная ў параўнанні з тралейбусам па спажыванні электрычнай энергіі», – адзначыў Сяргей Манастырэнка.

Па тэхнічным пашпарце электробусы зарэгістраваны як аўтобусы. Стаць кіроўцам новай машыны было няпроста. Сярод 14 чалавек, якія маюць катэгорыю D, праводзілі конкурс. У выніку выбралі чатырох спецыялістаў на два электробусы.

Па матэрыяле ТРК «Магілёў»