Конкурс прафесійнага майстэрства сярод спецыялістаў па каменных работах пройдзе ў Магілёве 6 ліпеня на базе аб’екта, які будуецца ў мікрараёне Спадарожнік – шматкватэрнага жылога дома №28. Пачатак працоўнага спаборніцтва – 8.30.

Па словах арганізатараў, мерапрыемства праводзіцца з мэтай павышэння прэстыжу будаўнічых прафесій, павелічэння прафесійнага майстэрства работнікаў будаўнічых арганізацый, папулярызацыі перадавога вопыту сярод рабочых.

«Больш за тое, конкурс ставіць задачы ўдасканалення прафесійных уменняў і навыкаў работнікаў будаўнічых прафесій і павышэння іх канкурэнтаздольнасці на рынку працы», – адзначыў незалежны эксперт конкурсу, старшыня абласнога камітэта Беларускага прафсаюза работнікаў будаўніцтва і прамысловасці будаўнічых матэрыялаў Сяргей Валькоўскі.

Да ўдзелу ў конкурсе дапускаюцца муляры са стажам працы, не меншым за тры гады. На выкананне задання ім адводзіцца 5 гадзін. За гэты час яны павінны зрабіць мур неармаваных перагародак таўшчынёй у паўцагліны пры вышыні паверху да 4 метраў, а таксама пабудаваць перагародку з лёгкабетонных пліт у 1 пласт пры такой жа вышыні паверху.

Пры ацэнцы канкурсантаў будуць улічвацца якасць і хуткасць выканання работ, выкананне іх тэхналагічнай паслядоўнасці і бяспечных умоў працы, арганізацыя працоўнага месца і культура вытворчасці.

Па выніках конкурсу брыгады-ўдзельніцы, якія занялі прызавыя месцы, будуць узнагароджаны дыпломамі адпаведных ступеняў і памятнымі падарункамі. Таксама пераможцаў вызначаць у намінацыях: «Найлепшая будаўнічая арганізацыя», «Найлепшая брыгада муляроў», «За высокую якасць выкананых работ», «Найлепшая брыгада па ахове працы».

Арганізатары конкурсу – ААТ «Будаўнічы трэст №12» кіруючая кампанія холдынгу «Будтрэст-Холдынг».