Кожны кандыдат у дэпутаты мясцовых Саветаў 28-га склікання зможа мець да пяці давераных асоб. Такую інфармацыю размясціў Цэнтрвыбаркам Беларусі.

Вылучэнне кандыдатаў у дэпутаты будзе ажыццяўляцца з 10 снежня па 8 студзеня, прычым 8 студзеня – гэта апошні дзень здачы дакументаў. Непасрэдна рэгістрацыя будзе праводзіцца з 9 па 18 студзеня адпаведнымі акруговымі і тэрытарыяльнымі выбаркамамі.

Затым пачынаецца перыяд перадвыбарчай агітацыі. Для гэтых мэтаў кандыдаты маюць права выкарыстоўваць СМІ, вырабляць і распаўсюджваць агітацыйныя друкаваныя матэрыялы, праводзіць масавыя мерапрыемствы ў паведамляльным парадку (сходы, мітынгі, пікетаванне), сустракацца з выбаршчыкамі і ажыццяўляць агітацыю ў іншых формах.

«Дапамогу ў правядзенні агітацыйнай кампаніі кандыдатам у дэпутаты мясцовых Саветаў аказваюць іх давераныя асобы. Давераных асоб можа быць да пяці у кандыдата», – гаворыцца ў паведамленні ЦВК. За кошт бюджэтных сродкаў акруговымі і тэрытарыяльнымі выбаркамамі вырабляюцца агульныя плакаты з біяграфічнымі дадзенымі кандыдатаў для размяшчэння на тэрыторыях выбарчых акругаў. Таксама за кошт сродкаў бюджэту вырабляюцца і накіроўваюцца ўсім выбаршчыкам інфармацыйныя матэрыялы пра прэтэндэнтаў на дэпутацкі пост.

Можна на бязвыплатнай аснове карыстацца прадастаўленымі памяшканнямі для сустрэч з выбаршчыкамі. Акрамя таго, кандыдаты ў дэпутаты абласных, Мінскага гарадскога, раённых, гарадскіх (гарадоў абласнога падпарадкавання) Саветаў будуць мець магчымасць бясплатна выступіць па дзяржаўным радыё.

Для самастойнага фінансавання дадатковых мерапрыемстваў па перадвыбарнай агітацыі дазваляецца ствараць уласныя выбарчыя фонды ў наступных памерах: кандыдаты ў дэпутаты абласных, Мінскага гарадскога Саветаў – да 30 базавых велічынь (адна БВ складае Br23); кандыдаты ў дэпутаты іншых Саветаў – да 10 базавых велічынь.

Вылучэнне на мясцовых выбарах у Беларусі праводзіцца традыцыйнымі спосабамі: ад палітычных партый, ад працоўных калектываў і ад грамадзян шляхам збору подпісаў. Самавылучэнцам неабходная падтрымка: не менш за 150 выбаршчыкаў – у абласны, Мiнскi гарадскi Савет дэпутатаў; не менш за 75 выбаршчыкаў – у раённы, гарадскі (горада абласнога падпарадкавання) Савет дэпутатаў; не менш за 20 выбаршчыкаў – у гарадскі (горада раённага падпарадкавання), пасялковы, сельскі Савет дэпутатаў.

Выбары ў мясцовыя Саветы дэпутатаў прызначаныя ў Беларусі на 18 лютага 2018 года.

БЕЛТА