Купал і крыж устаноўлены на храм Праабражэння Гасподняга, які будуецца ў Бабруйску. Іх вырабілі на прадпрыемстве «Софрино» ў Маскоўскай вобласці, паведамляецца на сайце Бабруйскай епархіі.

Як адзначыў настаяцель храма пратаіерэй Дзмітрый Баркар, Спаса-Праабражэнскі храм на вуліцы Мінскай стане першым у Бабруйску двухпавярховым. Ніжняя яго частка будзе прысвечана Свяціцелю Спірыдону Трыміфунцкаму, а верхняя – Праабражэнню Гасподняму. Умяшчальнасць складзе каля 500 чалавек. Побач плануецца будаўніцтва нядзельнай школы і бібліятэкі.

Узвядзенне храма цягнецца ўжо каля чатырох гадоў. Скончыць работы плануецца ў снежні 2018 года. Аднак многае будзе залежаць ад умоў надвор’я і фінансавання: будаўніцтва ідзе цалкам на ахвяраванні і сродкі царкоўнай абшчыны.

У якасці падрадчыка выступае арганізацыя «ЭнергаРамонтСэрвіс». Праект належыць творчай майстэрні архітэктара Галушчанкі.