Губернатар Ленінградскай вобласці Аляксандр Драздзенка і старшыня Магілёўскага абласнога выканаўчага камітэта Леанід Заяц змацавалі сёння подпісамі дакумент, які вызначае параметры супрацоўніцтва двух рэгіёнаў на наступны перыяд. Зацвярджэнне адбылося ў межах VI Форума рэгіёнаў Расіі і Беларусі.

План мерапрыемстваў па рэалізацыі пагаднення паміж Урадам Ленінградскай вобласці і Магілёўскім абласным выканаўчым камітэтам змяшчае пералік мерапрыемстваў па пошуку партнёраў для прадпрыемстваў рэгіёнаў з мэтай асваення новых рынкаў збыту, садзейнічанне гаспадарчым суб’ектам пры ўдзеле ў сумесных кірмашах, семінарах, форумах і стажыроўках; развіццё электроннага абмену інфармацыяй у галіне бібліятэчнай справы і турызму; адукацыйнае супрацоўніцтва праз правядзенне семінараў, алімпіяд, у тым ліку ў дыстанцыйным фармаце; гуманітарны і культурны абмен і інш.

Беларусь з’яўляецца адным з асноўных эканамічных партнёраў Ленінградскай вобласці сярод дзяржаў-удзельніц СНД. Супрацоўніцтва з яе рэгіёнамі развіваецца больш за два дзесяцігоддзі і ахоплівае розныя сферы. Пашырэнню дзелавых і сяброўскіх сувязяў дапамагаюць рэгулярныя рабочыя сустрэчы кіраўніцтва абодвух бакоў.

Асноўным напрамкам супрацоўніцтва па інтэнсіўнасці сувязяў з’яўляецца ўзаемадзеянне ў аграпрамысловым комплексе.

Узаемадзеянне ажыццяўляецца ў адпаведнасці з пагадненнем паміж урадамі Ленінградскай вобласці і Беларусі аб супрацоўніцтве ў гандлёва-эканамічнай, навукова-тэхнічнай і культурнай галінах ад 15 мая 2006 года, а таксама пагадненнямі аб супрацоўніцтве з Віцебскім, Гомельскім, Мінскім, Магілёўскім абласнымі выканаўчымі камітэтамі. Таксама заключана 24 дамовы з раёнамі Беларусі аб узаемадзеянні на ўзроўні органаў мясцовага самакіравання.

VI Форум рэгіёнаў Расіі і Беларусі праходзіць 16-18 ліпеня ў Санкт-Пецярбургу. Падзея аб’яднала каля 600 чалавек з абедзвюх краін. На пляцоўцы форуму прадстаўлены больш за 70 расійскіх і ўсе беларускія рэгіёны.

Па матэрыяле сайта lenobl.ru