Магілёў з гастролямі наведае тэатр адэскага разліву «Ланжеронъ». Харкаўская трупа 17-18 лістапада прадставіць на сцэне абласнога драматычнага тэатра два спектаклі, паведамілі карэспандэнту сайта ў адміністрацыі ўстановы культуры.

Тэатр «Ланжеронъ» пакарыў Магілёўскага гледача ў 2018 годзе, калі браў удзел у міжнародным моладзевым тэатральным форуме «М.@rt.кантакт» са спектаклямі «Ліст Богу» і «Тэза з нашага двара», – расказалі суразмоўцы.

Гэтым разам трупа прывязе ў абласны цэнтр спектаклі «Вы мяне ўсміхнулі...» і «Тэза з нашага двара». «Спецыфіка тэатра – пастаноўкі ў фармаце монаспектакля, якія і будуць прадстаўлены на гастролях у Магілёве. Прадставіць іх нашай публіцы акцёр, заслужаны артыст Украіны Віталь Бондараў», –удакладнілі суразмоўцы.

Лірычна-гастранамічная камедыя «Вы мяне ўсміхнулі...» па расказах карэннага адэсіта Сашкі Бірштэйна пачнецца 17 лістапада ў 18.30. У пастаноўцы галоўны герой раскажа пра «Адэскія асаблівасці», пра якія ведаюць далёка за межамі Адэсы і самой Украіны.

18 лістапада ў 18.30 тэатралы змогуць паглядзець монаспекталь «Тэза з нашага двара», пастаўлены па матывах аднайменнай трагікамічнай аповесці Аляксандра Канеўскага. Спектакль расказвае аб вялікім чалавечым братэрстве, аб дабрыні і вернасці, гуманнасці і міласэрнасці, высакароднасці і аб тых вечных каштоўнасцях нашага жыцця, якія і складаюць яе сутнасць. Плачучы, смеючыся і радуючыся, глядач суперажывае ўсім тым персанажам адэскага дворыка, пра якія кранальна і з іроніяй апавядае заслужаны артыст Украіны Віталь Бондараў.

Спектакль «Тэза з нашага двара» – лаўрэат шматлікіх міжнародных фестываляў і конкурсаў. Атрымаў «Прыз глядацкіх сімпатый» у Германіі (г. Гановер), Македоніі (г. Бітола), Ізраілі (г. Іерусалім), Літве (г. Вісагінас), Латвіі (г. Рыга), Малдове (г. Кішынёў), Кіргізіі (г. Бішкек), Балгарыі (г. Варна); прыз за «Найлепшую мужчынскую ролю ў камерным спектаклі» Міжнароднага фестывалю «Мельпамена Таўрыі» (г. Херсон, Украіна).

Тэатр адэскага разліву «Ланжеронъ» на працягу 10 гадоў радуе гледачоў спектаклямі на сцэнічных пляцоўках Харкава, Украіны і краін замежжа. У рэпертуары 9 спектакляў. Ідэйныя натхняльнікі тэатра – рэжысёр Галіна Панібрацец і акцёр – заслужаны артыст Украіны Віталь Бондараў. Спецыфіка Тэатра «Ланжеронъ» – пастаноўкі ў фармаце монаспектакля. Жанравая асаблівасць выбару рэпертуару – трагікамедыя. Спектаклі тэатра адзначаны прэміямі, дыпломамі і ўзнагародамі на міжнародных фестывалях і конкурсах.