Магілёўская гарадская капэла сёння адкрые дваццаты сезон. Першы канцэрт адбудзецца ў касцёле Узнясення Найсвяцейшай Панны Марыі, паведамілі карэспандэнту сайта ў адміністрацыі капэлы.

У святочным канцэрце прымуць удзел ганаровыя госці – заслужаны дзеяч культуры Беларусі Рыгор Сарока і лаўрэат міжнародных конкурсаў Ксенія Пагарэлая, салісты Вольга Кохан і Вераніка Чарапанава.

У першым аддзяленні канцэрта ўпершыню ў нашым горадзе прагучыць вакальна-сімфанічны твор «Credo» для салістаў, хору і аркестра бельгійскага кампазітара польскага паходжання Анры Сярока.

Упрыгожаннем другой часткі свята стане гучанне новага аргана. У выкананні салісткі канцэртнай залы Сафійскага сабора ў Полацку Ксеніі Пагарэлай, якая добра вядомая аматарам класікі як у Беларусі, так і за мяжой, прагучаць творы для аргана Іагана Себасцьяна Баха, а таксама англійскага кампазітара і арганіста эпохі позняга барока Джона Стэнлі. У суправаджэнні камернага складу будзе выкананы Канцэрт Рэ мажор чэшскага кампазітара, яркага прадстаўніка ранняга класіцызму Францішака Ксавера Брыксі.

Магілёўская гарадская капэла была ўтворана 25 жніўня 1998 года ў складзе камернага хору і аркестра. З таго часу ў Магілёве пастаянна стала гучаць вакальна-сімфанічная музыка.